Kur një drejtuese e Shërbimit Informativ të Shtetit dyshohet për zbulim të të dhënave sekrete dhe përkrahje të autorit të krimit, çështja nuk mund të mbetet vetëm në dyert e prokurorisë. SPAK ka konfirmuar dyshimet penale ndaj Vlora Hysenit dhe masat e arrestit në shtëpi e të pezullimit nga detyra. Hetimi duhet të përcaktojë përgjegjësinë e saj; por Kuvendi duhet të kërkojë llogari për sigurinë e shtetit.
Pyetja që kërkon përgjigje të menjëhershme është: çfarë informacioni mund të jetë nxjerrë, kush ka pasur qasje në të dhe çfarë është bërë për të kufizuar dëmin? Publikut nuk i duhen hollësi që rrezikojnë burime, operacione apo hetimin. Por i duhet siguria se institucionet po veprojnë dhe se askush nuk po e trajton këtë rast si një skandal që do të harrohet pas disa ditësh.
Për këtë arsye vlerësohet se Kuvendi duhet të mblidhet urgjentisht për të dëgjuar raportimin e qeverisë dhe të drejtuesve përgjegjës për sigurinë. Pjesa ku shqyrtohen të dhëna të klasifikuara duhet të zhvillohet me dyer të mbyllura, ndërsa përfundimet që mund të bëhen publike duhet t’u komunikohen qytetarëve. Rregullorja e Kuvendit e lejon seancën plenare të mbyllur me kërkesë të motivuar të Presidentit, Kryeministrit ose të paktën një të pestës së deputetëve; vendimi merret me shumicën e të gjithë anëtarëve.
Nuk ka pse seanca me dyer të mbyllura të shfrytëzohet nga opozita për kapital politik. Por parlamentit duhet t’i raportojë SPAK-u, natyrisht me dyer të mbyllura, se sa është dëmi i shkaktuar.
Asnjë deputet nuk duhet të bëjë gjyqin e SPAK-ut dhe askush nuk duhet ta shpallë Vlora Hysenin fajtore përpara vendimit të gjykatës. Por pritja e përfundimit të procesit penal nuk mund të jetë arsye për të shtyrë kontrollin parlamentar. Nëse ka pasur rrjedhje sekretesh, dëmi duhet vlerësuar tani dhe masat mbrojtëse duhen marrë tani.
Heshtja nuk është përgjigje për një dyshim të kësaj peshe. Kuvendi duhet të kërkojë të vërtetën, të mbrojë sekretet shtetërore dhe t’u tregojë qytetarëve se kush mban përgjegjësi për sigurinë kombëtare.