PD thirrje komisionerëve dhe policisë: Zbatoni ligjin për procesin e zgjedhjeve

Kur kanë mbetur edhe 5 minuta nga përfundimi i orarit të votimit, Partia Demokratike ka bërë një deklaratë për mediat ku u kërkon komisionarëve dhe policisë të zbatojnë ligjin.

“Partia Demokratike i bën thirrje komisionerëve, personelit të policisë dhe të gjithë strukturave përgjegjëse për administrimin e procesit zgjedhor të marrin të gjitha masat për përmbylljen e procesit të votimit sipas ligjit deri në dorëzimin e kutive të votimit në qendrat e numërimit.

Garantimi i standardeve ligjore dhe dorëzimi i kutive sipas ligjit është pjesë thelbësore e përmbylljes së procesit të votimit”,- thuhet në deklaratën e PD.

Ky është komunikimi i parë zyrtar për mediat i Partisë Demokratike gjatë gjithë ditës së sotme për procesin e votimit.

Nuk dihet se cilat janë arsyet që e detyruan PD tu bëjë thirrje komisionarëve dhe policisë. Por në raste të ngjashme, këto njoftime bëhet kur ka dyshime se Policia apo komisionarët nuk po zbatojnë ligjin.