Petrit Vasili: Amerika i vë vulën shitblerjes së votës

Raporti i fundit i Departamentit Amerikan të Shtetit për të drejtat e njeriut në Shqipëri, kritikon qeverinë “Rama”. Në një reagim fill pas publikimit të raportit, ish-kreu i grupit parlamentar i LSI-së, Petrit Vasili, shprehet se DASH foli qartë për çëshjten e zgjedhjeve, sipas tij të vjedhura nga qeveria Rama.

Konkretisht në raport shkruhet: “Në qershor 2017, vendi mbajti zgjedhjet parlamentare. Organizata për Siguri dhe Bashkëpunim në Evropë (OSBE) raportoi se zgjedhjet respektonin liritë themelore, por u prekën nga akuzat për blerjen e votave dhe presionin mbi votuesit”.

Vasili shprehet se në bazë të këtij raporti, qeveria ”Rama 2”, del e jashtëligjshme, ndaj dhe bën thirrjen për rrëzimin e qeverisë.

”Amerika i vë vulën shitblerjes së votës. Departamanti Amerikan i Shtetit foli qartë se zgjedhjet e 2017 ishin: Shitblerje vote dhe presion. Nga shitblerja e votës u zgjodh Edi Rama, kjo qeveri dhe deputetët që ndërtuan kapjen e shtetit. Ndaj Edi Rama dhe qeveria janë të jashtligjshme. Rrëzimi i tyre është shpëtimi i demokracisë dhe i qytetarëve’‘,-shkruan Vasili në facebook.