Presidenti Meta: Rama të heqë dorë nga shantazhet

Presidenti i Republikës Ilir Meta nga Durrësi i bëri apel partive politike që të bëhen gati për zgjedhjet vendore të 13 tetorit. Kreu i shtetit tha se për këtë çështje ka njoftuar edhe Sekretarin e Përgjithshëm të OSBE-së, që të ndërhyjë në mënyrë që të vendoset normaliteti në vend dhe të gjendet zgjidhje për krizën politike.

Në prononcimin e dhënë për mediat, Presidenti i Republikës bëri thirrje kryeministrit Edi Rama të heqë dorë nga shantazhet dhe presionet ndaj institucioneve të tjera duke penguar zbatimin e dekretit të tij për zgjedhjet e 13 tetorit. Ai tha se Shqipëria ndodhet në një teatër të madh politik e absurd dhe iu bëri thirrje si maxhorancës ashtu dhe opozitës t’i japin fund. “Ajo që na shqetëson më shumë është ky Teatri i madh politik, absurd, i cili kërcënon që Shqipëria të dërrmojë çdo mundësi për të çelur negociatat në 17-18 tetor. Prandaj dhe njëherë iu bëj thirrje të gjithëve, në mënyrë të veçantë të tre artistëve t’i japin fund këtij absurdi të marrin masa për zgjedhjet vendore më 13 tetor sepse qytetarët shqiptarë kanë nevojë të kenë qetësi, normalitet, një qeverisje vendore të ligjshme dhe legjitime dhe po kështu që garanton llogaridhënie për të gjitha shqetësimet e tyre”,- tha Meta.

Lidhur me datën 13 tetor dhe mbajtjen e zgjedhjeve vendore normale, Presidenti tha se “zgjedhjet vendore nuk besoj se zgjidhin gjithçka por ky është një detyrim ligjor dhe kushtetues i pashmangshëm. Në radhë të parë është detyrim për kryeministrin që të heqë dorë nga shantazhet dhe presionet ndaj gjithë institucioneve të tjera duke penguar zbatimin e këtij dekreti dhe padyshim është përgjegjësi e gjithë të tjerëve të bëhen gati për të marrë pjesë në zgjedhjet e 13 tetorit”.

Kreu i shtetit tha se prej kohësh ka kërkuar dialog të qëndrueshëm, jo për demagogji por për marrje përgjegjësish nga të gjitha palët. “Sot kemi një parlament që nuk jep llogari para askujt, një shumicë që kontrollon gjithçka. Sot jemi në një situatë kaotike në të gjitha drejtimet. Opozita i ka pasur të gjitha mundësitë për të parandaluar me propozime me këmbë në tokë. Shqipëria nuk mund të ecë në dy rrugë që nuk takohen me njëra-tjetrën, rruga e kapjes së të gjitha institucioneve nga njëra anë dhe rruga tjetër e de legjitimimit të gjitha institucioneve. ne kemi nevojë për një rrugë, rruga e përbashkët e anëtarësimit në BE”,- tha Presidenti Ilir Meta

VIDEO/Deklarata e plotë e Presidentit Ilir Meta në Durrës