Nga Spiten Prulli-
Mënyra skandaloze dhe poshtërimi që kanë tentuar t’i bëjnë Presidentes së Kosovës, Vjosa Osmani në aeroportin ndërkombëtar të Shkupit prej autoritetëve të aeoroportit maqedonas shkon direkt në fyerjen e shtetit të Kosovës, por edhe krejt shqiptarëve në rajonin e Ballkanit. Në fillim u mendua si një shkelje e një pjestari të aeroportit, por më vonë kur ministria e brendshme e Maqedonisë dhe autoritetet zyrtare të aeroportit theksuan se kemi “zbatuar ligjin dhe rregulloren”, atëhere kjo krijon incident diplomatik.
Por pse ministrat dhe zv.kryeministrat shqiptarë në qeverinë e Maqedonisë së Veriut nuk reaguan hapur në mbrojtje të Presidentes së Kosovës, sepse ishte dhunuar personaliteti i saj, por edhe i shtetit të Kosovës? Partia shqiptare VLEN, vetëm emrin ka kështu, pasi nuk vlen për asgjë për shqiptarët dhe kombin! Ata qenkan ca kolltufagë dhe servilë për një post e privilegje për vete.
Pikërisht këta që kanë emër shqiptar si Izet Mexhiti, Zv/kryeministër dhe ministri i Mjedisit dhe Planifikimit Hapësinor, Arben Fetai, Zv/kryeministër i ngarkuar për qeverisje të mirë, Arben Taravari, Ministër i Shëndetësisë, Fatmir Limani, Ministër i Politikës Sociale, Demografisë dhe Rinisë, Orhan Murtezani si Ministër i Çështjeve Evropiane, Besar Durmishi, Ministër i Ekonomisë dhe Punës duhej të kishin dhënë menjëherë dorëheqjen sot, pas deklaratës së ministrit të brendshëm, Pançe Toshkovski.
Dhe le ta provonin maqedonasit zyrtarë të bënin naze, kur krejt spektri politik shqiptar të ishte bllok kundër mënyrës se si trajtuan presidenten e Kosovës. Binte qeveria maqedonase!
Nëse ishte incident, edhe falet, por kjo është mënyrë sjellje e Kryeministrit të Maqedonisë së Veriut, sepse dolën me deklaratë, duke e bërë më të poshtër veprimin e parë në aeoroport.
Ndërkohë presidenca e Kosovës prapë shpreh indinjatën për deklarimet e Ministrisë së Brendshme të Maqedonisë dhe lajmet e pavërteta, duke rikujtuar edhe njëherë Konventën e Vjenës që mbron personalitetet në udhëtimet e tyre.
Po e sqarojmë edhe njëherë situatën në tërësi shkruan Presidenca:
Sipas praktikës ndërkombëtare dhe Konventës së Vjenës për Marrëdhënie Diplomatike, kur krerët e shtetit udhëtojnë, ata mbrohen me privilegje dhe imunitete diplomatike. Kjo është e ditur botërisht dhe deri më tani është respektuar nga çdo shtet ku ka udhëtuar Presidentja, përfshirë edhe shtetet që nuk e kanë njohur Kosovën. Pala maqedonase ka qenë paraprakisht e njoftuar zyrtarisht për udhëtimin e Presidentes në përputhje me praktikat diplomatike.
Nuk është e vërtetë se Presidentja nuk ka pranuar ta skanojë çantën e saj të dorës. E para, Presidentja nuk ka pasur bagazh siç propagandohet në reagime të shumta në media, në Maqedoninë e Veriut. Pra, është gënjeshtër se ajo ka refuzuar t’i kontrollohet bagazhi. Ajo ka pasur një çantë të dorës personale të cilën menjëherë e ka vendosur në skaner, edhe pse sigurimi, sipas praktikave e konventave ndërkombëtare, nuk kishte të drejtë të kërkonte një gjë të tillë. E vetmja gjë që Presidentja nuk ka pranuar ta dorëzojë ka qenë telefoni i saj.
Është skandaloze të pretendohet nga kushdoqoftë se gjoja Presidentja kishte diçka të dyshimtë në çantën e saj. Jo vetëm se është një e pavertëtë e madhe, por kjo njëkohësisht është akuza më e rëndë dhe propaganda më e rëndë e bërë ndonjëherë nga media në Maqedoni të Veriut në drejtim të Republikës së Kosovës. Edhe më skandaloze është deklarata e sotme e MPB-së, se kinse ministri i brendshëm i Maqedonisë së Veriut paska pasur disa informata, të cilat kanë shpier tek kërkesa për kontroll të çantës personale dhe telefonit të Presidentes. Kjo është tendencë e paprecedentë për denigrim jo vetëm të Presidentes, por edhe të shtetit të Kosovës. Maqedonia e Veriut duhet ta ketë parasysh që një propagandë të tillë është duke e bërë kundër një Presidenteje, e cila gjatë gjithë mandatit të saj ka kontribuar vetëm e vetëm në thellimin e raporteve pozitive ndërmjet Kosovës dhe Maqedonisë së Veriut.
Nuk është e vërtetë se kompania private apo koncesionarët e aeroportit janë mbi shtetin dhe mbi konventat ndërkombëtare të cilat përcaktojnë rregulla të qarta për trajtimin e kreut të shtetit. Edhe Aeroporti i Prishtinës është i koncesionuar dhe menaxhohet nga kompani private, por ne nuk lejojmë asnjëherë që një president i një shteti tjetër të trajtohet në mënyrë të tillë jodinjitoze e arrogante dhe të kërkohet t’i merret telefoni personal për vendosje në skanerë.
Një gjë e tillë është jashtë çdo praktike dhe bie ndesh me protokollet e sigurisë dhe praktikat ndërkombëtare, duke qenë se telefoni i Kreut të Shtetit dihet qartë se përdoret për komunikim zyrtar, përfshirë edhe për çështje të sigurisë. Në kundërshtim me këto standarde ishte edhe kontrolli i çantës së dorës së Presidentes, por ajo përkundër kësaj menjeherë e ka vendosur çantën në skaner.
Edhe pse Policia e Kosovës ia ka komunikuar paraprakisht zyrtarëve të aeroportit të Shkupit rregullat e aplikueshme në situata të tilla, ata kanë tentuar ta pengojnë fizikisht Presidenten, me ç’rast në përputhje të plotë me protokollet e sigurisë, ka reaguar profesionalisht Policia e Kosovës.
Situata e djeshme në Aeroportin e Shkupit nuk mund të shpjegohet e as të vlerësohet ndryshe, përveçse si një provokim i pastër dhe tendencë për të shkaktuar incident.
Në vend të arsyetimeve dhe lejimit të propagandës kundër Republikës së Kosovës, kërkojmë nga autoritetet zyrtare në Shkup që me urgjencë ta trajtojnë rastin me seriozitet të lartë dhe të merren masat përkatëse ndaj zyrtarëve që kanë bërë këtë sulm ndaj Republikës së Kosovës.
Nga SHBA-të e deri te shtetet e tjera të rajonit, në çdo udhëtim të Presidentes respektohen në plotëni rregullat e trajtimit të kreut të shtetit dhe ASNJËHERË nuk kërkohet të preket, e lëre më të dorëzohet në skaner as telefoni i Presidentes, as çanta e dorës e as valixhja e saj (carry on).
Këto janë rregulla që i respekton çdo shtet e i kanë respektuar edhe shtetet jonjohese, sepse kreu i shtetit përfaqëson vet shtetin. Pra Kosova në kë rast nuk po kërkon asgjë tjetër pos normave që respektohen çdokund në botë. Çdo shkelje e këtyre normave konsiderohet shkelje e mosrespekt ndaj vet shtetit.