Rama flet për hetimet ndaj Bankers: Prokuroria t’i nxjerrë ujin e zi, na detyrohen 240 milionë euro

Kryeministri Edi Rama ka komentuar ditën e sotmë në rubrikën ‘Sy m’Sy’ në rrjetet sociale hetimet e Prokurorisë ndaj kompanisë “Bankers Petrolium”, që operon në fushat e naftës në Patos-Marinzë.

“Ne kemi fituar me Bankers një arbitrazh dhe Bankers na detyrohet 240 milionë euro. Shyqyr që ka ardhur dita ku prokuroria heton në mënyrë të pavarur dhe në këtë rast i heq kapelën që ka bërë këtë invetsigim dhe uroj ti nxjerrë ujin e zi asaj ndërmarrjeje, ku realisht ka pasur shumë problematika dhe që është akoma sot e gjithë ditën, kostoja e një koncesioni të dhënë para se unë të merrja detyrën. Koncesionet që kemi dhënë, nuk do t’i lija pa i ribërë, janë në shërbim të popullit shqiptar. Por koncesionet që kemi trashëguar janë ç’janë, ato janë vrima të zeza”, tha mes të tjerash Rama.

Koncesioni është miratuar nga qeveria e Fatos Nanos për 30 vjet.

Ndërkohë ish-deputeti demokrat Myslim Murrizi ka akuzuar disa zyra “konsulence”, ku pas tyre fshihen ish-deputetë e ish-ministra të PS dhe PD të cilat kanë marrë nga Bankers 11.5 milionë euro.