Rama kërcënon opozitën me burg nga Cërriku, asnjë fjalë për përgjimet

Pas 24 orësh heshtje totale për përgjimet e gazetës gjermane Bild, Edi Rama u shfaq sot në media. Kryeministri mori pjesë në prezantimin e kandidatit të PS për zgjedhjet e qershorit në Cërrik.

Edhe pse pritej që në këtë fjalim Edi Rama të distancohej nga ajo çfarë i dëgjuan veshët për vjedhjen e votave në Durrës apo dhe të mohonte përgjimet, kryeministri ka zgjedhur të heshtë.

Për 30 minuta kryeministri foli sikur në vend nuk ka ndodhur asgjë. Sikur njeriu i tij më afërt Vangjush Dako nuk është kapur bërë pazare elektorale me bandat. Sikur një trafikant droge në Shijak nuk ka caktuar kandidatët e Ramës për deputet. Kryeministri foli për reformat e mëdha që po bën qeveria e tij, ndërkohë që përgjimet vënë në dyshim pikërisht legjitimitetin e qeverisë. Foli dhe për opozitën duke deklaruar se do t’a mund në zgjedhje! Kujtojmë që në 30 qershor Edi Rama ka në garë vetëm kandidatët e tij që garojnë me veten.

Ndërsa fliste për fitore, në fjalimin e Edi Rama nuk munguan kërcënimet. Edhe njëherë kryeministri i kujtoj qytetarëve se nëse prekin procesin zgjedhor të 30 qershorit do të përfundojnë në burg. Gjithashtu, kërcënoi dhe me bllokim vizash për në Bashkimin Europian.