Detaje të reja janë mësuar nga mbledhja mbi katërorëshe e kryebashkiakëve me kryeministrin Edi Rama në Kuç të Vlorës, ku në qendër të diskutimeve ka qenë reforma territoriale dhe riorganizimi i hartës së bashkive.
Takimi është shoqëruar me debate të forta mes kryeministrit dhe disa prej drejtuesve vendorë, të cilët kanë kundërshtuar shkrirjen e bashkive që drejtojnë.
Përplasjet nuk janë kufizuar vetëm te Poliçani dhe Dimal. Mësohet se debate të forta me Ramën kanë pasur edhe kryetari i Bashkisë Selenicë, Nertil Bello, dhe kryetari i Bashkisë Divjakë, Josif Gorrea. Në debat është përfshirë edhe ministri i Shtetit për Pushtetin Vendor, Arbjan Mazniku.
Bello dhe Gorrea u kanë qëndruar argumenteve të tyre kundër shkrirjes së bashkive, duke ngritur pikëpyetje mbi kriteret e përdorura për përcaktimin e njësive vendore që do të preken nga riorganizimi territorial.
Në diskutim janë përmendur konkretisht Peqini, Vau i Dejës dhe Roskoveci. Sipas argumenteve të ngritura nga kryebashkiakët, këto bashki kanë tregues më të dobët performance, por janë lënë sërish si bashki më vete. Ata kanë pretenduar se kjo dëshmon se kriteret nuk po aplikohen në të njëjtën mënyrë për të gjitha njësitë vendore.
Një tjetër moment i fortë i mbledhjes ka qenë debati për reagimin e komuniteteve lokale. Mësohet se Rama i ka akuzuar kryebashkiakët se po nxisin qytetarët e zonave të tyre kundër reformës territoriale. Sipas kryeministrit, kundërshtimi nuk po mbetet vetëm në nivel institucional, por po shtrihet edhe te komunitetet, duke krijuar rezistencë ndaj ndryshimeve të propozuara.
Nga ana tjetër, kryebashkiakët kanë kërkuar që kriteret për riorganizimin e hartës territoriale të jenë të qarta, transparente dhe të zbatohen njësoj për të gjitha bashkitë.
Përplasja me kryebashkiaken e Dimalit
Tone të ashpra ka pasur edhe mes Ramës dhe kryetares së Bashkisë Dimal, Juliana Memaj. Mësohet se gjatë diskutimeve Rama i është drejtuar me ironi kryebashkiakes duke i thënë: “Ju udhëheqësit e mëdhenj”.
Memaj i është përgjigjur duke kundërshtuar mënyrën se si po trajtohen drejtuesit vendorë. “Ç’udhëheqës zeza! Ne jemi bërë si punëtorë komunaleje”, mësohet të ketë thënë Memaj. Kjo përgjigje ka acaruar kryeministrin, i cili i ka kërkuar kryebashkiakes së Dimalit të largohet nga mbledhja.
Debat i ashpër edhe me Adriatik Zotkajn
Përplasje ka pasur edhe me kryetarin e Bashkisë Poliçan, Adriatik Zotkaj, i cili publikisht ka mbajtur qëndrim kundër shkrirjes së bashkisë që drejton. Gjatë debatit, Rama ka përmendur edhe rastin e djegies së teserave në Poliçan, duke e cilësuar atë si një akt të papranueshëm.
“Ti nuk duhet të ishe fare këtu. Ajo që bëri Poliçani me djegien e kartave ishte një akt paturpësie”, mësohet t’i ketë thënë Rama Zotkajt. Kryebashkiaku i Poliçanit i është përgjigjur duke akuzuar Partinë Socialiste dhe kryeministrin për mosmirënjohje.
“Komuniteti iu përgjigj veprimit mosmirënjohës të PS-së dhe Kryeministrit. Në ka një mosmirënjohje, është ajo e PS-së”, mësohet të ketë thënë Zotkaj. Pas debatit, Zotkaj dhe Memaj janë larguar nga mbledhja.
Pavarësisht kundërshtimeve të kryebashkiakëve, Rama ka mbrojtur nevojën për vijimin e reformës territoriale. “Kjo është një reformë për Shqipërinë dhe jo një reformë për një bashki apo për një tjetër. Reforma do të ecë përpara”, mësohet të ketë deklaruar kryeministri.
Mbledhja ka zgjatur më shumë se katër orë dhe është fokusuar te reforma territoriale, riorganizimi i bashkive dhe kriteret që do të përcaktojnë se cilat prej tyre do të vijojnë të ekzistojnë si njësi të veçanta të pushtetit vendor.
Debatet e forta tregojnë se riorganizimi territorial pritet të jetë një nga çështjet më të diskutuara në raportet mes qeverisë qendrore dhe drejtuesve vendorë, veçanërisht në bashkitë që rrezikojnë të preken nga harta e re.