Shkolla ”Kolë Jakova” bëhet qendër komunitare, Rama ndan pamjet: Ambiente të reja për 500 nxënës

Shkolla 9-vjeçare ”Kolë Jakova” në Tiranë është rikonstruktuar dhe është gati të mirëpresë mbi 500 nxënës në kushte të përmirësuara për zhvillimin e procesit mësimor. Kryeministri Edi Rama ka ndarë pamje nga ambientet e rikonstruktuara të shkollës, duke theksuar se ”Kolë Jakova” do të funksionojë edhe si shkollë qendër komunitare.

Përveç mësimit, ambientet e reja do të shërbejnë për zhvillimin e aktiviteteve të ndryshme jashtë orarit mësimor, duke e kthyer shkollën në një hapësirë të hapur për nxënësit dhe komunitetin e zonës së Bregut të Lumit. Sipas Ramës, shkolla synon të krijojë më shumë mundësi për të mësuar, zhvilluar aftësitë dhe nxitur talentin e të rinjve të komunitetit.

”Shkolla 9-vjeçare “Kolë Jakova” në Tiranë është gati të mirëpresë mbi 500 nxënësit e saj, e rilindur dhe me kushte dinjitoze për zhvillimin e procesit mësimor. Si shkollë qendër komunitare, “Kolë Jakova” do të ofrojë tashmë ambiente më të mira për nxënësit, por edhe për organizimin e aktiviteteve të ndryshme përtej orarit mësimor. Një shkollë e hapur për gjithë komunitetin e zonës së Bregut të Lumit në Tiranë për të mësuar, për t’u zhvilluar dhe nxitur talentin”,-shkruan Rama.