Sot fadromat fillojnë prishjen e banesave të 312 familjeve te Unaza e Re

Sot forcat e policisë dhe fadromat do të fillojnë zbatimin e planit për prishjen e ndërtesave dhe objekteve të 312 familjeve të Unaza e Re ose zona e “Astirit” siç quhet.

Në një kohë kur sot pritet nisja e shembjeve të banesave që preken nga ndërtimi i Unazës së Re, banorët e zonës së ‘Astirit’ kanë paralajmëruar një tjetër protestë. Ata bllokuan dje rrugën, duke ndalur qarkullimin e makinave për disa orë. Banorët thanë se kësaj çështje do t’i shkojnë deri në fund, ndërsa nuk do të ndalen deri sa qeveria t’i dëmshpërblejë siç i takon. Kujtojmë se për 15 ditë me radhë banorët e Unazës së Re protestuan kundër vendimit të qeverisë për shembjen e banesave, ndërsa akuzuan këtë të fundit se do t’i nxjerrë në rrugë dhe pa i dëmshpërblyer.

Po ashtu edhe Avokatja e Popullit, Erinda Ballanca tha se nuk është e qartë leja e ndërtimit për këtë projekt, duke shtuar se qeveria duhet të gjente një zgjidhje për banorët e kësaj zone.

Për të shmangur përplasjen fizike sot dhe këto ditë do jenë të angazhuara qindra forca policie.

Opozita ka akuzuar kryeministrin dhe kryebashkiakun se nuk duan ti dëmshpërblejnë 100 % të vlerës. Ndërkohë shumë banorë kanë paralajmëruar se do të jetë luftë e vertetë, nëse fillojnë shembjen e tyre.