SPAK heton abuzimin e fondeve të BE për bujqësinë. Priten arrestime VIP nga të gjitha fushat, sepse janë përzier shumë emra…

“Prokuroria e Posaçme kundër Korrupsionit dhe Krimit të Organizuar ka regjistruar procedim penal dhe çështja është në fazën e hetimeve. Për shkak të ruajtjes së sekretit hetimor, nuk mund të bëjë publike informacione të mëtejshme”, -sqaron SPAK në përgjigjen e tij të përmuajshme në faqen zyrtare.

Ndërkohë OLAF ka kërkuar te Altin Dumani për ndëshkimin e autorëve por edhe kthimin e shumave në miliona euro që janë marrë gjoja për zhvillimin e bujqësisë apo blegtorisë nga fondet e BE, por janë konvertuar në vila, shtëpi luksoze, rezorte turistike,etj.

Mësohet se SPAK ka nën hetim ish-ministra, ish-zv/ministra, deputetë, ish-deputetë, kryetarë dhe ish-kryetarë bashkishë, zyrtarë të lartë, oligarkë e biznesmenë, njerëz të medias, grupe kriminale, etj që kanë marrë shumat miliona euro nga fondet e BE.

Nga burime të brendshme sqarohet se BE ka si një prej kushteve, jo publike për momentin, që pa u hetuar kjo dosje për abuzime me fondet e programit IPARD II nuk do të ketë përparime në rikthimin e fondeve për bujqësinë.

SPAK ka vendosur nën përgjim kokat kryesore të kësaj afere si dhe disa nga emrat që kanë përfituar nga paratë e bujqësisë. Kjo dosje është nevralgjike për BE sepse flitet jo vetëm për manipulime të parave të Brukselit, por edhe për të parë se sa vepron drejtësia në vend.