Tërmet i fuqishëm në Japoni: Dyshohet për shumë viktima

Dhjetëra vetë u shtruan në spital pas një tërmeti që goditi jugun e Japonisë. Sipas raportimeve të mediave mendohet se shumë persona kanë humbur jetën.

Një tërmet i fuqishëm me magnitudë 7.1 goditi të martën pasdite Prefekturën Kumamoto në ishullin jugor japonez Kyushu. Sipas televizionit publik të Japonisë NHK “shumë njerëz” mbetën të bllokuar në qendrën tregtare Aeon, e cila u dëmtua nga tërmeti. NHK raportoi edhe se  pas tërmetit u shtruan në spital të paktën 50 vetë.

Po ashtu njoftohet se në që një qendër tjetër tregtare ndodhi një shpërthim. Sipas radios lokale TBS policia deklaroi se dyshohet se prej shpërthimit kanë humbur jetën “një numër i konsiderueshëm personash”.

Autoritetet po verifikojnë dëmet

Kryeministrja japoneze, Sanae Takaichi, deklaroi se sipas raportimeve fillestare ka pasur shumë të plagosur, dëme në infrastrukturën civile dhe zjarre në disa nga zonat e prekura.

“Ne ende po vazhdojmë vlerësimin e situatës, shkallën e plagosjeve, lëndimeve dhe dëmeve materiale, por tashmë jam e informuar se ka pasur disa të lënduar,” tha Takaichi.

Ajo shtoi se në disa zona ka pasur “ndërprerje të energjisë elektrike dhe zjarre, si dhe janë dëmtuar rrugë dhe ura apo janë shembur ndërtesa”

Megjithëse tërmeti shkaktoi përkohësisht frikë për një cunami, zyrtarët konfirmuan më vonë se rreziku ishte zbutur dhe se vija bregdetare e Japonisë nuk ishte më në rrezik.

“Ky tërmet ndodhi në tokë dhe deri tani nuk është vërejtur asnjë aktivitet cunami,” tha një zëdhënës i Agjencisë Meteorologjike të Japonisë (JMA). “Për këtë arsye, shpresojmë ta heqim paralajmërimin për cunami në një fazë relativisht të hershme, në varësi të gjendjes së nivelit të detit.”

Furnizimi me energji dhe centralet bërthamore të sigurta

Enti Rregullator Japonez për Energjinë Bërthamore raportoi se nuk janë konstatuan parregullsi në tri centrale bërthamore pranë zonës së goditur nga tërmeti.

Megjithatë tërmeti shkaktoi ndërprerje në furnizimin me energji elektrike në të gjithë rajonin. Sipas kompanisë Kyushu Electric Power rreth 45,000 familje dhe objekte në Kumamoto mbetën përkohësisht pa energji pas lëkundjeve të tërmetit.

Pranë zonës së tërmetit ndodhen disa objekte të mëdha industriale, ndër to të kompanive Sony dhe Taiwan Semiconductor Manufacturing Company (TSMC), prodhuesi më i madh i çipave në botë. Sony njoftoi se po vlerëson gjendjen në objektet e tij.