Trump kërcënon Nigerinë: “Do nis ushtrinë amerikane për të mbrojtur të krishterët”

Presidenti amerikan paralajmëron ndërhyrje ushtarake dhe ndalimin e ndihmës për Nigerinë, duke e akuzuar qeverinë e këtij vendi për mosmbrojtjen e komuniteteve të krishtera. Grupet e armatosura islamike po vrasin masivisht të krishterët në Nigeri.

Presidenti i Shteteve të Bashkuara, Donald Trump, ka paralajmëruar mundësinë e një veprimi ushtarak kundër Nigerisë, duke e akuzuar qeverinë e vendit afrikan se “nuk po bën mjaft për të ndalur dhunën ndaj komuniteteve të krishtera”.

Në një postim të gjatë në rrjetet sociale, Trump e përshkroi situatën si “masakër kolektive” dhe njoftoi se ka kërkuar nga Departamenti i Mbrojtjes “të përgatitet për veprime të mundshme”.

“SHBA mund të shkojë në atë vend tashmë të diskredituar, me armë të ndezura, për të shkatërruar terroristët islamikë që kryejnë këto mizori,” – shkroi Trump, duke paralajmëruar edhe ndalimin e menjëhershëm të ndihmës amerikane për Nigerinë.

Reagimi i Pentagonit erdhi përmes Sekretarit të Mbrojtjes, Pete Hegseth, i cili në rrjetet sociale deklaroi se “Departamenti i Luftës po përgatitet për çdo skenar”.

Nga ana tjetër, presidenti nigerian Bola Tinubu e quajti përshkrimin e dhunës “të njëanshëm dhe të gabuar”, duke theksuar se qeveria e tij po punon për të mbrojtur të gjitha komunitetet fetare.

Ai shtoi se “dhuna në vend ka shkaqe të shumëfishta – fetare, etnike dhe ekonomike – dhe kërkon zgjidhje të balancuar, jo ndërhyrje ushtarake”.

Ekspertët paralajmërojnë se ky tension i ri mund të përshkallëzojë ndërhyrjet amerikane në Afrikë, duke hapur një kapitull të ri diplomatik dhe ushtarak me pasoja të paparashikueshme për rajonin.