Trump: Mos kini frikë, Rusia nuk ju sulmon!

Presidenti i Shteteve të Bashkuara, Donald Trump, ka thënë se nuk beson se Moska do ta sulmojë ndonjë vend anëtar të NATO-s, me gjithë rritjen e shqetësimeve se presidenti rus, Vladimir Putin, mund të urdhërojë sulm ndaj një vendi baltik ose ndonjë tjetër vendi anëtar, për ta vënë në sprovë vendosmërinë e aleancës perëndimore.

Trump u tha gazetarëve të enjten vonë në Zyrën Ovale të Shtëpisë së Bardhë, se kishte zhvilluar “biseda të mira” me Putinin dhe se “ai nuk do të sulmojë territorin e NATO-s”.

Trump nuk tregoi se kur ishin zhvilluar këto biseda.

“Unë nuk jam fare i shqetësuar… nuk ka asnjë telash”, citoi më herët Trumpin mediumi Axios, kur ai u pyet nëse ka mundësi që Rusia ta provokojë ndonjë shtet të NATO-s.

Këto deklarata u bënë në të njëjtën kohë kur Kremlini i hodhi poshtë si “rrëfime frikësuese” raportet në mediat amerikane se Moska mund ta sulmojë NATO-n, si dhe pas një vizite të papritur të drejtorit të CIA-s në Moskë, shkruan ndër të tjera radio Europa e Lirë.