Trump sulmon kryetarin e bashkisë së Londrës përpara Starmer: “Një person i keq”

Presidenti amerikan Donald Trump nuk kurseu fjalët ndaj kryetarit të bashkisë së Londrës, Sadiq Khan, gjatë një takimi me kryeministrin britanik Keir Starmer. I pyetur nëse do të vizitonte Londrën gjatë vizitës së tij zyrtare në shtator, Trump u përgjigj prerazi: “Nuk jam fans i kryetarit të bashkisë. Mendoj se ai ka bërë një punë të tmerrshme… një person i keq”.

Në përpjekje për ta zbutur situatën, Starmer ndërhyri duke e quajtur Khan një mik të tij, por Trump nuk u tërhoq: “Mendoj se ai bëri një punë të tmerrshme. Por unë patjetër do ta vizitoja Londrën”.

Pavarësisht toneve kritike ndaj Khan, Trump u shpreh pozitivisht për kryeministrin Starmer dhe Nigel Farage, duke thënë se i pëlqen të dy, megjithëse kanë qëndrime politike të kundërta: “Të dy janë njerëz të mirë”.

Deklaratat kanë ngritur sërish tensionet mes Trump dhe Khan, një përplasje që daton prej kohësh dhe që tani ka shpërthyer në mënyrë të drejtpërdrejtë edhe përballë liderit të ri britanik.