Televizionet kryesore përplasen me anëtarët e AMA, ndërsa OSBE hesht !

Top Channel dhe TV Klan-dy televizionet kombëtare që kishin aplikuar për t’u pajisur me licensë të transmetimeve numerike, kanë kundërshtuar vendimin e bordit të AMA-s ku u shpall nul procedura e Beauty Contestit.

Përmes shënimeve në edicionet e tyre të lajmeve, Top Channel dhe TV Klan e cilësuan të padrejtë votimin e Sami Nezës dhe Suela Mustës-dy anëtarët e bordit të AMA-s të propozuar nga Partia Demokratike, ndërsa i kërkuan politikës të mos bllokonte licencimin e mediave audiovizive në vend.

“Televizioni Klan- i licencuar si televizion kombëtar prej 16 vitesh… shpreh habi dhe keqardhje për këtë vendim të këtyre anëtarëve. Dhënia e licencave Dixhitale nuk është ndonjë privilegj për ne, por është një detyrim ligjor për të fikur transmetimet analoge në bazë të marrëveshjeve të shtetit shqiptar me Bashkimin Europian,” thuhet në kronikën e TV Klan, e cila paralajmëroi edhe një padi gjyqësore për këtë çështje.

Në të njëjtën linjë ka qenë edhe reagimi i Top Channel, i cili akuzoi politikën se po mbante peng çdo sferë të jetës në Shqipëri.

“Dy votat kundër në AMA janë pikërisht të anëtarëve që prej më shumë se një viti nuk kanë qenë të pranishëm në mbledhjen e këtij autoriteti, duke djegur edhe afatet kohore të paraqitura në nenin 136 të ligjit për median,” tha Top Channel.

“Edhe në 2016, e njëjta votë politike e ndarë është duke bllokuar një realitet kombëtar dhe ndërkombëtar siç janë Top Channel dhe Digitalb,” shtohet në reagim.

Por dy anëtarët e shenjëstruar të AMA, Suela Musta dhe Sami Neza sqaruan se vota e tyre kundër kishte dy arsye; tejkalimin e afateve ligjore të procesit dhe përqendrimin e pronësisë tek operatorët audiovizivë. Anëtarët e pakicës shpjeguan për BIRN se Beauty Contesti ishte parashikuar në dispozitat kalimtare të ligjit dhe se avantazhi u jepej operatorëve historikë brenda një kufiri të caktuar kohor, që sipas tyre është 17 qershor 2015.

“Tejkalimi i afateve kohore cënon rëndë besueshmërinë e garës,” i thanë BIRN, Neza dhe Musta.

Argumenti i dytë i votës së tyre kundër lidhet me raportin e pronësisë së operatorëve historikë, që u përzgjodhën nga AMA për t’u përfshirë në Beauty Contestin e licensave dixhitale. Dy anëtarët e pakicës në AMA vlerësuan se “dokumentat e depozituar nga Digitalb dhe TV Klan nuk janë në përputhje me nenin 62 të ligjit.

“Përqindja e aksioneve të bashkëfamiljarëve të DigitAlb dhe Klan kalon dukshëm minimumin 40 % , që është kufiri i përcaktuar sipas nenit 62 të Ligjit,” thanë Neza dhe Musta për BIRN.

Neni 62 i ligjit të AMA përcakton se “asnjë person fizik apo juridik, vendas apo i huaj nuk mund të ketë më shumë se 40 për qind të kapitalit të shoqërisë aksionare, që zotëron një licencë kombëtare të transmetimit audioviziv”.

Përveç dy televizioneve kombëtare, arsyeja e afateve kohore nga dy anëtarët e pakicës në AMA u cilësua “i paargumentuar” edhe nga kryetari i AMA, Gentian Sala.

“Argumenti i përdorur prej tyre nuk qëndron, pasi afatet janë djegur për shkak të mungesës së tyre dhe jo për ndonjë faj të operatorëve,” tha Sala.

Zv.kryetari i AMA, Sami Neza dhe anëtarja Suela Musta i thanë BIRN se ky argument nuk qëndron.

“Mosprezenca jonë nuk ka shkaktuar asnjë ditë zvarritje të afateve ligjore. Kanë qenë vetë operatorët që kanë kërkuar më shumë kohë për plotësimin e dokumenteve të garës,” thanë ata.

Pas shfuqizimit të Beauty Contestit, AMA po bëhet gati të nisë procedurën e një gare të hapur për licensimin e operatorëve privatë, ndërkohë që këta të fundit kanë paralajmëruar padi gjyqësore.

Ky akt kërkon një kohë shtesë për procesin, por dy anëtarët e pakicës në AMA janë në mbështetje të një gare të hapur, transparente dhe të pandikuar nga politika.“Licencimi për dixhitalizimin, aq i shumë pritur, nuk duhet imponuar nga media dhe as nga politika si legalizim i antiligjit,” përfundoi Musta për BIRN.

Por OSBE po hesht, kur perdite fliste per kete çeshtje te liçensimit sipas ligjit. OSBE e mberthyer nga interesat meskine!