Petrit Vasili: Jam i surprizuar nga neni 13 për censurën. Është i papranueshëm!

Kryetari i Grupit Parlamentar të Lëvizjes Socialiste për Integrim, Petrit Vasili ka kritikuar ashpër futjen e nenit për censurimin e medias, në ligjin për Byronë e Hetimit dhe Prokurorinë Speciale.

Në një deklaratë për mediat, Vasili u shpreh se një nen i tillë është i papranueshëm. Kreu i deputetëve të LSI-së është shprehur i befasuar nga futja e këtij neni. Ai ka konfirmuar se një projekt i tillë nuk ka kaluar në draftin e miratuar në komision.

“Jam i surprizuar nga neni 13 i SPAK. Ky paragraf nuk ka qenë në draftin e kaluar në komision. Ky paragraf i nenit 13 është i papranueshëm. Nuk ka institucion të pakritikueshëm në demokraci. Liria e medias është dimension jetik në demokraci. Do të kërkoj në komision heqjen e këtij  paragrafi te papranueshëm”,- tha kreu i deputetëve të LSI-së.

Kjo është kritika më e fortë që ka ardhur nga mazhoranca lidhur me nenin që kufizon ndikimin e medias në punën e institucioneve të reja të drejtësisë. Fjala është për ligjin “Për organizimin dhe funksionimin e institucioneve për të luftuar korrupsionin dhe krimin e organizuar”. Neni 13 i këtij drafti, nga mënyra sesi është hartuar, sanksionon censurën dhe ndëshkimin e mediave që ndërhyjnë në veprimtarinë e Strukturës së Posaçme AntiKorrupsion që njihet me emrin (SPAK), e cila përbëhet nga Prokuroria e Posaçme dhe Byroja Kombëtare e Hetimit. Konkretisht në këtë nen shkruhet se, “çdo lloj influence e papërshtatshme e ushtruar mbi punën e prokurorëve të posaçëm apo aktivitetin e tyre mbi çështje konkrete përmes autoriteteve publike, mediave apo çdo mënyre apo personi tjetër, që ndikon mbi pavarësinë e prokurorëve gjatë ushtrimit të detyrave të tyre, ndalohet dhe dënohet me ligj”. Dënimi në Kodin Penal për këtë lloj vepre shkon deri në tri vite burg.

Një nismë e tillë është kundërshtuar dje ashpër edhe nga shoqatat kryesore të gazetarëve në vend, duke e cilësuar si një censurë të pastër ndaj mediave. Liria e fjalës është e garantuar nga Kushtetuta e Shqipërisë. Ajo që po bën mazhoranca me këtë nen është rikthimi i censurës dhe dënimi me burg i gazetarëve me anë të një ligji të veçantë duke e justifikuar me reformën në drejtësi.

Por pyetja në këtë rast është se kush e futi në ligjet e reformës në nismë të tillë që u afrohet vetëm standardeve ligjore që kanë diktaturat.

Zyrtarisht PS nuk ka mbajtur një qëndrim të prerë për këtë ligj. Është e paqartë nëse ky nen është futur nga ekspertët e Partisë Socialiste me urdhër nga lartë, apo është vendosur nga ekspertët ndërkombëtarë. Në të dyja rastet kemi të bëjmë me shkelje flagrante të lirisë së shprehjes.

Kush e futi nenin e censurës për median:Edi Rama apo ndërkombëtarët?