Çmimet letrare kombëtare/ Mira Meksi merr çmimin e parë në Letërsi, vlerësohet për përkthimin më të mirë

Në Bibliotekën Kombëtare të Shqipërisë u regjistruan 3016 botime të reja për vitin e shkuar, por vetëm gjashtë prej tyre janë vlerësuar si më të mirat e vitit 2022.

Për përkthimin më të mirë, u vlerësua Mira Meksi që edhe nga panairi i nëntorit u vlerësua si shkrimtare. Mira Meksi u shpall dje fituesja e Çmimit Kombëtar në Letërsi në gjininë e përkthimit me romanin “Vjeshta e Patriarkut” e Nobelistit Gabriel Garcia Marques.

Me motivacionin e “Sjelljes së romanit me një shqipe të pastër me një sintaksë pabesueshmërisht të qartë që respekton jo vetëm stilin e autorit, por dhe sjell me autenticitet një shumësi zërash, një përrua fjalësh, figurash, me muzikalitetin e një fuge barole”, Juria profesioniste kombëtare e kryesuar nga Kryetari i Akademisë së Shkencave dhe Arteve të Kosovës, akademik Mehmet Kraja, shpallën fituese Mira Meksi mes shumë veprave të shkëlqyera të sjella mjeshtërisht në shqip në vitin që po lëmë pas.