Dy emra, sinonim i Kosovës dhe Erzenit, simbol i krenarisë kombëtare

Kultura E Hënë, 13 Shtator 2021 20:39

Kosovare Rrustemi, e vetmja deputete shqiptare në parlamentin e Zvicrës dhe legjenda e boksit, Erzen Rrustemi, krenarë për origjinën dhe vendlindjen

Nga Halil RAMA

Një vit më parë, gjatë vizitës në Gjilan, Presidenti i Republikës Ilir Meta i akordoi Hajdin Rrustemit (pas vdekjes) “Dekoratën e Artë të Shqiponjës”, me motivacionin: “Në vlerësim të figurës së tij si pjesëmarrës i kryengritjeve patriotike të periudhës 1910-1920, si dhe për rolin e çmuar si ndërmjetës e pajtues i shumë gjaqeve e mosmarrëveshjeve në Malësinë e Karadakut”. (Nr.Dekreti 10657, datë 22.11.2017).

Stërnipi i tij, legjenda e boksit, Erzen Rrustemi dhe e motra Kosovare Rrustemi, e vetmja deputete shqiptare në parlamentin e Zvicrës, nuk ngurojnë ta shfaqin krenarinë e të qënit, stërnip dhe stërmbesë të Hajdinit, si një nga bashkëluftëtarët e Idriz Seferit, Sulejman Vokshit, Mic Sokolit, Abdyl Shkupit, Ali Ibër Nezës, të cilët nuk u sprapsën asnjëherë nga synimi kryesor, ruajtja e tokave shqiptare nga copëtimi dhe realizimi i idesë për pavarësi.

Pikërisht, në vigjilje të festave të mëdha kombëtare të Nëntorit, Erzeni ndjehet më krenarë se kurrë edhe për faktin se gjyshi i tij, Hajdini është dekoruar ditën kur në vendlindjen e tij në Gjilan, u përurua shtatorja e Idriz Seferit, këtij prijësi të madh të luftërave për mbrojtjen e tokave shqiptare në një hark kohor dyzetvjeçar.

Kjo krenari kombëtare i bën Kosovare dhe Erzen Rrustemin të njohin vetëm arritje atje ku ata aderojnë.

“U rrita nga gjyshërit e xhaxhallarët në vendlindjen ime në Zhegërr të Karadakut, ku kalova fëmijërinë deri në moshën 10 vjeçare. Ata më edukuan me dashurinë për mëmëdheun, me ndjenjën e zjarrtë të atdhetarisë, për ta mbajtur këtë ndjenjë të gjallë deri sot në moshën 35 vjeçare, në Zvicër ku jetoj familjarisht prej vitesh si dhe në garat e ndeshjet e shumta në vende të ndryshme të botës”,-thotë Erzeni. E ndërsa vijon këndshëm biseda në prani edhe të mjeshtrit të gazetarisë sportive, kolegut e mikut tonë të ngushtë Defrim Methasani, një nga promovuesit më të mirë të personazheve me vlera dhe arritje inkurajuese në fushën e sportit, Erzeni flet me mallëngjim edhe për xhaxhain e tij, Sadik Rrustemi, që sipas tij u largua për në botën e përtejme me brengën që s’arriti dot të vizitojë Shqipërinë…Dhe jo vetëm kaq. Ai përlotet kur përmendet emri i xhaxhait tjetër, Sabit Rrustemit – ish deputet i LDK dhe bashkëpunëtor i Presidentit Rugova, gjithashtu ish – i burgosur politik nga regjimi i Beogradit.

Ndërsa përgatitet intensivisht për ndeshjen e radhës për të mbrojtur titullin kampion bote në boks, Erzen Rrustemi shprehet se me fitoret e njëpasnjëshme synon të lartësojë emrin e stërgjyshit, gjyshit, të xhaxhait ish-deputet dhe të motrës deputete në parlamenin e Zvicrës, Kosovare Rrustemi.

Kush është Kosovare Rrustemi

Kosovare Rrustemi nga Zhegra e Gjilanit është e vetmja deputete shqiptare në Asamblenë e Kantonit të Solothurnit të Zvicrës.

Ajo jeton në Zvicër që nga viti 1993, ndërsa në vitin 2016 është bërë anëtare e Partisë Sociale, me të cilin edhe garoi dhe u zgjodh deputete.

Rrustemi ka qenë asambleiste në komunën e Derendigenit, ndërkaq si deputete në Kantonit të Solothurnit synon të arrijë diçka në fushën e arsimit dhe të drejtat e barabarta te shqiptarët, por edhe të gjitha komunitetet që jetojnë atje.

Para se të hyjë në politikë, ajo ka qenë drejtuese e organizatës Terre des Hommes e cila merret me fëmijët dhe ka degë edhe në Kosovë. Ajo krenohet me arritjet e vella Erzenit si Kampion Botëror në boks.

“Mjeshtri i Madh” Erzen Rrustemi, Kampion

Bote në W.B.F në peshat e rënda të boksit profesionist

Për vetë origjinën nga Familja e njohur e Zhegerrit të Karadakut të Gjilanit, nga kanë dalë patriotë të shquar shqiptarë, dhe nga ku është edhe ikona e futbollit Gjerdan Shaqiri, legjenda e boksit Erzen Rrustemi është krenari kombëtare. Jo vetëm për rezultatet si kampion bote, si i pamposhtur për shtatë vjet në Ligën Botërore Profesionale të Boksit, ku në 13 ndeshje ka korrur 13 fitore (11 para kohe), por për formimin, karakterin dhe profilin e admiruar nga sportdashësit e shumtë anë e mbanë globit.

Nëse 2017-tën e konsideron të pashlyeshme në kujtesën e tij, pasi arriti të gëzojë dhe të bëjë të ndjehen krenarë miliona shqiptarë, duke fituar tiullin Kampion Bote në W.B.F në peshat e rënda të boksit profesionist, Erzeni ka të ngulitur në memorie nderimin me Titullin “MJESHTËR I MADH” nga Presidenti i Republikës së Shqipërisë, si vlerësim i këtij triumfi, ku u intonua hymni kombëtar dhe Flamuri ynë u ngrit për herë të parë në majat e boksit botëror.

Pas kësaj vjen pritja madhështore në Prishtinë ku u nderua nga Federata e Boksit e Kosovës si dhe koncerti madhështor për nder të tij në Gjilan.

Por kampioni nuk “dehet” kurrë nga sukseset.

“Mbrëmja e 3 Marsit 2018 do të mbetet gjatë në kujtesën time, për faktin se arrita ta mbroj me sukses titullin e kampionit të botës, në pesha të rënda të boksit profesionist (WBF) si dhe të fitoj dhe një titull tjetër nga Global Boxing Union – GBU dhe kështu arrita ta përfaqësoj denjësisht kombin tim në arenat botërore të boksit, përmes Flamurit si dhe Hymnit Kombëtar, i cili ngriti në këmbë në Karslruhe Rheinstetten të Gjermanisë, mijëra të pranishëm, në shenjë nderimi”,- shprehet Erzeni, ndërsa fyryra i qesh nga gëzimi.

Më pas një çast prekës, kur deklaron se fitoren ua dedikon nënave të Gjakovës dhe të gjithë nënave shqiptare, të cilat që 19 vite pas luftës, i kërkojnë dhe i presin e nuk iu vijnë më të dashurit e tyre, që figurojnë në Listën e të zhdukurve. Por, fatmirësisht Kosova dhe liria e saj janë gjallë dhe janë në këmbë e po forcohen përditë e më shumë.

Mirënjohja si shprehja më e bukur e karakterit të njeriut i buron nga thellësia e shpirtit legjendës së boksit, kampionit Rrustemi. Ndaj dhe falendron me përzemërsi të gjithë ata shqiptarë nga shtete të ndryshme të Europës e që ishin të pranishëm në sallë, stafin e tij profersional e teknik që e përgatiti dhe kontribuoi në këtë fitore; familjarët që ishin me të dhe tjerët që e përcollën në distancë e, në veçanti, reperin e mirënjohur Duden dhe disa nga boksierët tanë të njohur në botë, e që janë edhe miqtë e tij, si kikboksieri Shemsi Beqiri, kampion i shumëfishtë i botës, pastaj Berat Aliun, Haxhi Krasniqin, Ismail e Gjetan Ketën e të tjerë që e inkurajuan dhe e e uruan.

Mirënjohjëe të veçantë i shpreh kamioni edhe kryetari të komunës së Gjilanit, Lutfi Haziri për kujdesin e treguar para e pas kësaj fitoreje dhe duke e shpallur kampionin Erzen Rrustemi “Qytetar Nderi të Gjilanit”. Mirënjohja është e shqiptarit kampion që mbrojti me dinjitet titullin e kampionit të botës (WBF) në peshat e rënda të boksit profesionist duke sfiduar kuundërshtarin e radhës, Juan Pedro Gugli Elmetti nga Argjentina.

Erzeni, i 66-ti në botë, ndër 1215 boksiore të kategorisë së rëndë

Legjenda e boksit Erzen Rrustemi renditet i 66-ti në botë, ndër 1215 boksiore të kategorisë së rëndë. BOXRECI, një asociacion botëror e i pavarur i rendtijes së boksierëve profesionistë, e ngriti atë në tabelë në pozitë të 66-tën, nga 1215 boskierë, ku i pari figuron Kampioni absolute i botës Anthony Joshua. Dhe, kjo me vetëm 13 duele.

Kjo për faktin se në 13 duelet e deritashme ai ka shënuar po aq fitore. Asnjërin nga kundërshtarët nuk e ka zgjedhur vetë, por fokusi i tij ka qenë vetëm se si t’i gjunjëzoj rivalët dhe të ecë përpara.

Erzen Rrustemi, me familjen tij (prindërit, tre vëllezër e një motër) që nga viti 1970 jetojnë në Bern të Zvicrës.

Aktualisht ai po përgatitet për ndeshjen e radhës që do të jetë në Blegjikë, për të mbrojtur Titullin e kampionit të botës, në pesha të rënda të boksit profesionist. Janë ditë të stërvitjes intensive (nga 6-7 orë në ditë), gjithë vullnet e përkushtim në Qendrën Olimpike në Bazel të Zvicrës, nga trajneri i njohur, kubanezi Liesser Guzman.