Figura shumëdimensionale e Skënderbeut, në telajot e Gjovalin Pacit, piktori çel ekspozitën vetjake

Figura shumëdimensionale e Heroit tonë Kombëtar, Skënderbeu erdhi në telajo, pas një kohe të gjatë reflektimi në pikturën e Gjovalin Pacit.

Pas 6-të vitesh mungesë, piktori i njohur çeli ekspozitën e tij vetjake, me titull “SKËNDERBEU”, e cila u përurua në ambientet e Muzeut Historik Kombëtar.

Kjo ekspozitë vjen në kuadër të Vitit Mbarëkombëtar të Gjergj Kastriotit Skënderbeut, me mbështetjen e Muzeut Historik Kombëtar .

Janë të paktën 80 punime në akrilik të pjekur e teknikë mikse, ku në çdo kuadro dallohen dy antitezat: nga njëra anë figura hijerëndë e Heroit Kombëtar, e nga ana tjetër eleganca e finesa me të cilën është realizuar çdo punë, raporton Atsh.

“Ekspozita në fakt është ndërtuar mbi legjendat që ne njohim që fëmijë prej gjyshërve dhe gjysheve, i rritur me letërsinë nëpërmjet Kadaresë, Barletit apo Schmidit”, u shpreh Gjovalin Paci.

Sipas Pacit, e kuqja dhe e zeza, të përdorura gjerësisht në telajo, fshehin simbolikën e fortë të piktorit. E zeza përfaqëson 550 vite që Skënderbeu nuk është më mes nesh, ndërsa ngjyrat e tjera tregojnë arritjet e dështimet e Heroit tonë Kombëtar. Piktori shprehet se Skënderbeu është një nga njerëzit tanë më të mëdhenj, por ai është dhe një figurë komplekse.

“Ai s’ka qenë vetëm një strateg, por edhe ushtarak i marrëdhënieve me jashtë. Jam munduar ta sjell si një njeri në tokë, jo vetëm si Hero Kombëtar”, shprehet Paci.

Ekspozita e Gjovalin Pacit do të jetë e hapur për vizitorët deri në datën 24 prill pranë sallës së ekspozitave në Muzeun Historik Kombëtar.