Lamtumira, Gëzim Kruja përcillet me duartrokitje e lot por pa homazhe

Lamtumira për mjeshtrin e humorit shkodran Gëzim Kruja ka qenë e rëndë për të gjithë dashamirësit e tij që nuk patën mundësi t’i bëjnë respektin e fundit. Aktori i madh u përcoll me duartrokitje në distancë, duke lënë pas trishtim, por edhe një pasuri rolesh në skenë.

Me lot e duartrokitje, mjeshtrit të humorit Gëzim Kruja iu dha lamtumira që nuk meritonte.

Për shkak të situatës së pazakontë të koronavirusit, homazhet për aktorin ishin të pamundura.

Por duke ruajtur distancën përshëndetjen e fundit ia dhanë edhe kolegët.

Drejtoja e  teatrit Migjeni e priti në rrugë kortezhin mes lotësh.

Rita Gjeka: Nuk mundemi me e nderuar sikurse ai e meriton, se ai ka nderuar gjithë Shkodrën se ka qenë shumë i mençur.

Ndërsa kolegu Muhamet Çekini ia dha lamtumirën atje ku do të prehet.

Muhamet Çekini: Kjo është shumë e vështirë për ne si shokë. Unë kam 48 vjetë që jetoj me të.

Gëzim Kruja mbylli sytë në moshën 80-vjeçare në shtëpinë e tij.

Mjeshtri i madh la pas kujtimin dhe punën e tij në mijëra role që kanë bërë të qeshin shqiptarët.