Parku Kombëtar i Lurës zgjerohet deri në Mat

Parku Kombëtar i Lurës është zgjeruar edhe me liqenin e Zall-Gjoçaj, duke krijuar Parkun Kombëtar “Lurë-Mali i Dejës”. Parku do të ketë një sipërfaqe prej 20 mijë e 242 hektarë.

Zona e zgjerimit të parkut përfshin sipërfaqe me tokë pyjore, shkurre dhe sipërfaqe ujore.

Parku Kombëtar “Lurë-Mali i Dejes” ndahet në tri nënzona ruajtjeje dhe administrimi.

“Aktivitetet shfrytëzuese të burimeve natyrore, të cilat ndodhen brenda territorit të parkut kombëtar dhe që janë pajisur me leje mjedisore dhe/ose vendim të KKT-së deri në datën e hyrjes në fuqi të këtij vendimi, do të lejohet të vazhdojnë ushtrimin e aktivitetit nëse përmbushin kushtet e parashikuara nga ligji nr.81/2017, “Për zonat e mbrojtura”, thuhet në vendimin e qeverisë.

Administrata Rajonale e Zonave të Mbrojtura të Qarkut Dibër kryen funksionet e administratës së Parkut Kombëtar “Lurë-Mali i Dejes”.

Ky vendim hyn në fuqi menjëherë dhe botohet në “Fletoren zyrtare”.