Takim me historianin dhe arkeologun Jani Koçillari

Aktivitetet e organizuara nga Drejtoria Rajonale e Kulturës Kombëtare Durrës në kuadrin e Tetorit të Librit u mbyllën dje në Muzeun Arkeologjik me një takim, prezantim dhe diskutim rreth librave të historianit dhe arkeologut nga Durrësi Jani Koçillari. Takimi nxiti një diskutim me mjaft interes, që lidhte përfundimet e studimeve me nevojën për një rishikim të interpretimit të pasurisë sonë arkeologjike, veçanërisht asaj të periudhës ilire.

Koçillari prezantoi librat e tij “Epiri dhe Aleksandër Molosi”, si dhe “Qeramikat me figura të kuqe”. Duke marrë shkas nga këto dy studime, u prekën shumë çështje kritike të arkeologjisë, trashëgimisë kulturore, interpretimit të saj dhe turizmit kulturor me aktorë të ndryshëm të qytetit.