“Thesaret e Arkivit të Filmit” sjell për publikun programin e dytë

Shkrimtari Dhimitër Xhuvani përfundoi në vitin 1966 romanin e tij të parë “Tuneli”, një vështrim pesimist i jetës së vështirë të minatorëve. I akuzuar nga autoritetet si revizionizëm borgjez, romani u tërhoq nga qarkullimi.

Në 1984, Xhuvani shkroi romanin e tij të fundit, “Bota ime”, që Kinostudio “Shqipëria e Re” e solli në ekranin e kinemasë me titullin ”SHPRESA”. Studiuesja Elsa Demo do të udhëheqë një diskutim rreth rrugëtimit të veprës nga roman në ekranin e kinemasë ku Matilda Makoçi shkëlqeu në rolin kryesor, falë mbështetjes së aktorit dhe regjisorit Eduart Makri, dhe aktorëve Edmond Budina e Drita Pelingu.

”SHPRESA” u xhirua në portin e Durrësit ku, vetëm një vit më vonë, ndodhi vala e parë e eksodit.

Ky është programi i dytë i “Thesaret e Arkivit të Filmit” – një program i Arkivit Qendror Shtetëror të Filmit kuruar dhe prezantuar nga personalitete të mendimit dhe hulumtimit bashkëkohor, vjen nesër në mbrëmje për publikun në kinema Agimi.