”Angjelina Arianiti Komneni-shpirti i Shenjtë i Arbërisë”, nga Zenepe Luka

Të shtunën u prezantua libri “Angjelina Arianiti Komneni-Shpirti i shenjtë i Arbërisë” i botuar nga gazetarja Zenepe Luka në 500 vjetorin e vdekjes së saj. Në 300 faqet e librit vijnë fakte dhe të dhëna për bijën e Gjergj Aranitit dhe motrën e Donika Kastriotit. Ky ishte amaneti i Ambasadores së Kombit Nermin Vlora Falaschi dhe misioni i Fondacionit me emrin e saj, që autorja e këtij libri e drejton prej 18 vjetësh, me mision promovimin e vlerave dhe kontributeve të gruas së shquar shqiptare në shekuj. Në faqet e librit vjen me fakte nderimi që i bëhet Shenjtores Angjelinë në Amerikë, Francë, Itali,Vojvodinë etj.

Kreu i bashkisë së Vlorës, Dritan Leli shprehu fjalët më të ndjera dhe vlerësuese për Lukën duke e cilësuar si një krenari dhe nder për qytetin. Edhe pse i thërret “Vlonjatja e Importuar”, kryebashkiaku Leli shprehet se ky libër mbart në faqet e saj gjak shqiptari dhe ndjesi atdhetare dhe për këtë secili duhet ta ketë në bibliotekën e tij.

“Biseda me ju është një kënaqësi e veçantë dhe ftesa që vjen nga ju është më e privilegjuar. U folën dhe thanë fjalë të ndjera për librin dhe sakrificën e bërjes së librit që nuk mund të ishte ndryshe nga emri i spikatur i një vlonjate e importuar si Zenepe Luka. Të kesh në bibliotekë këtë libër të shkruar me kaq pasion nga Zenepeja është të kesh pak gjak shqiptari të shkruar në faqet e këtij libri. Qyteti i Vlorës është i nderuar që ka një vlerë si Zenepja dhe kjo na bën krenar të gjithëve”, tha Leli