Në shitje për 1 milion paund banesa “më e hollë” e Londrës

Apartamenti pesëkatësh më i veçantë i Londrës ka dalë në shitje për rreth 1 milion paund.

Godina në perëndim të kryeqytetit britanik dallohet që nga fasada e jashtme.

Por tipari vërtet dallues nuk është ngjyra e saj blu, por brendësia dhe dimensionet.

“Shtëpia është e veçantë ngaqë është unike. Në Londër nuk ka shtëpi tjetër që të jetë 1 metër e 60 cm e gjerë në pikën më të ngushtë, dhe me kaq individualitet, me kaq historik. Është pak si magjia e Londrës.”

Hapësira e banimit në pallat sa vjen e ngushtohet me ngjitjen e kateve, duke përfunduar edhe me një kopsht në majën e vet.

Devid Majers, agjenti që po përpiqet ta shesë banesën, pranon se bukurinë e saj nuk para e vlerësojnë të gjithë; më shumë e pëlqejnë ata me një lloj shijeje prej artisti.

“E vërteta është se në këtë hapësirë mund të jetojnë një numër i kufizuar njerëzish. Dhe prej situatës së tanishme me kovidin, nuk kemi edhe aq blerës.”

Çmimi mesatar i apartamenteve në Britani është 250 mijë paund.

Ndërkohë banesa e veçantë është dyfishuar në vlerë në 15 vite dhe tani llogaritet në 950 mijë paund.

Ndër blerësit e saj ka qenë një aktor i njohur britanik, Sajmon Uds, dhe fotografi i modës, Jurgen Teler.