Deputeti i Partisë Demokratike, Enno Bozdo, ka kërkuar ndalimin e procedurës për Reformën Territoriale, duke kundërshtuar mënyrën se si po zhvillohet procesi në Komisionin për Çështjet Ligjore dhe Administratën Publike. Gjatë diskutimeve në komision, Bozdo u përplas me deputetin e mazhorancës, Ulsi Manja, duke akuzuar shumicën se po injoron qëndrimin e bashkive që preken nga ndryshimet territoriale.
Sipas deputetit demokrat, qytetarët dhe përfaqësuesit vendorë duhet të dëgjohen përpara se të merret një vendim përfundimtar. Ai theksoi se protestat e bashkive kundër reformës janë një tregues se propozimet e tyre nuk janë marrë në konsideratë. “Jeni ende në kohë të bllokoni procedurën”, deklaroi Bozdo, duke kërkuar që mazhoranca të shqyrtojë variantet e propozuara nga përfaqësuesit vendorë dhe të zgjedhë atë që, sipas tij, i shërben më mirë qytetarëve. Deputeti i PD-së kritikoi gjithashtu argumentin se Reforma Territoriale duhet të miratohet brenda afateve të lidhura me procesin e integrimit europian. Sipas tij, Bashkimi Europian nuk përcakton një numër të caktuar njësish vendore dhe as një standard për madhësinë e bashkive.
“BE-ja nuk kërkon një standard për pushtetin vendor apo numrin e njerëzve në bashki”, tha Bozdo. Ai akuzoi mazhorancën se po vijon procesin pavarësisht kundërshtimeve nga pushteti vendor, ndërsa e cilësoi të papranueshme që diskutimet për një reformë të tillë të shoqërohen me protesta. Bozdo tha se opozita nuk synon bllokimin e reformës, por kërkon që të shqyrtohet një variant sa më i mirë për qytetarët dhe njësitë vendore.
