A do të garojë Salianji për kryetar të PD? Paloka: Kandidaturat vendosen mbi kritere

Kryetari i Këshillit Kombëtar i PD-së, Edi Paloka ka komentuar debatin për garën për kryetar, mes përplasjeve me ish-deputetin Ervin Salianji. Për të nuk ka përjashtime për shkak të mendimeve ndryshe, duke u shprehur se ai vetë përfaqëson frymën e bashkimit dhe jo të përjashtimit. ”Nuk ka asnjë përjashtim për mendime kundër apo zëra kundër. Unë jam për bashkim, jo për përjashtim”,-u shpreh ai, duke shtuar se çdo vendim i tillë kalon përmes strukturave përkatëse të partisë. Paloka sqaroi se PD ka një organ të posaçëm, të cilin e quajti gjykata e partisë, që shqyrton rastet mbi bazën e provave dhe statutit, dhe që merr vendime të pavarura nga opinionet individuale.

Ai theksoi se çdo organizatë politike ka rregulla që duhet të respektohen dhe se edhe në statutin e PD-së parashikohen raste për përjashtimin e anëtarëve, duke shtuar se këto çështje nuk duhen trajtuar në mënyrë subjektive. Sa i takon debatit për tensione të brendshme, Paloka e cilësoi si të ekzagjeruar narrativën për krizë në PD, duke theksuar se debati është pjesë e natyrshme e një partie demokratike.

”Nëse ka diçka që e dallon PD, është pikërisht debati. Nuk kemi pasur kurrë diçka hermetike”,-deklaroi ai, duke bërë një krahasim me PS-së dhe mënyrën e funksionimit të saj. I pyetur nëse Ervin Salianji do të lejohet të kandidojë për kryetar të PD-së, Paloka tha se procesi ende nuk ka nisur dhe se kandidaturat do të kalojnë përmes filtrit të kritereve dhe strukturave të partisë.