A do tërhiqet Greqia nga gazsjellësi TAP?

Orët e fundit, një zëdhënëse e gazsjellësit TransAdriatik bëri të ditur se ata janë të hapur ndaj Iranit, për t’u bërë pjesë e këtij investimi të rëndësishëm.

Kjo vjen një ditë pasi kryeministri grek, Aleksis Cipras, ishte për vizitë në Rusi, ku u takua me presidentin Vladimir Putin.

Vizita ishte pozitive, por a pati ndonjë rezultat konkret?

Të paktën për një çështje u fol konkretisht.

Bëhet fjalë për gazsjellësin Turkish Stream që sjell gazin rus nga Deti i Zi, në Turqi e më pas në drejtim të Perëndimit deri në vitin 2019.

Një gazetë greke shkruan se Moska duket se i ka joshur grekët, duke thënë se do ua parapaguajë fitimet e ardhshme nga biznesi ndërkombëtar i gazit, për të fituar mbështetjen e Athinës për projektin.

Por Greqia është e angazhuar tashmë në projektin e gazsjellësit TAP, që dërgon gazin azer nga Greqia, në Shqipëri dhe më pas në Itali, duke anashkaluar Rusinë.

Dy- tre herë, qeveria e re greke ka dhënë sinjale se mund të ndryshojë mendje për këtë projekt.

A ka kontradikta mes dy projekteve?

Eksperti për çështjet e Rusisë, Konstantinos Filis, profesor për marrëdhëniet ndërkombëtare në Athinë, thotë për DW se nuk ka asnjë problem.

Sipas tij, asnjë projekt nuk e përjashton tjetrin.

Përfundimisht ajo që ka rëndësi, është të gjenden financimet e nevojshme për secilin projekt.

“As Greqia dhe as Rusia nuk janë në gjendje që të vendosin të vetme për një projekt,” tha Filis.