A e ka mbushur “kupën” Sali Berisha?

Nga Zef Shtjefni

Duke i hedhur një sy rrjeteve sociale dhe mediave të ditës, nuk është aspak e vështirë të kuptosh se afro 90% e shqiptarëve e kanë drejtuar gishtin drejt Sali Berishës, duke e etiketuar atë si shkaktari kryesor i nxitjes dhe frymëzimit të krimit, të destabilitetit, kontrastit dhe urrejtjes politike në vend. Pjesa më e madhe e shqiptarëve, që prononcohen me emër apo pa emër, mendojnë se Sali Berisha, i ka futur marshin makinës së destabilitetit, për rimarrjen e pushtetit të humbur përmes dhunës, duke sabotuar dhe zgjedhjet lokale. Duke parë paaftësinë, mungesën e guximit e të kurajos, pavendosmërinë apo dhe dilemën e mazhorancës qeverisëse, si dhe duke pasur të emëruarit e tij në Prokurori, SHISH, Presidencë dhe në gjithë merimangën e mafias së Drejtësisë, Berisha ka të drejtë të besojë se këtij qëllimi mund t’ia arrijë me lehtësi. Ajo që po ndodh sot anë e mbanë vendit me terrorin e tritolit sa herë Berisha bën thirrje që të ngrihemi të rrëzojmë Qeverinë e Ramës, apo sa herë i vërsulet Ministrin e Brendshëm, apo sa herë Qeveria kalon një situatë të vështirë, siç ishte ajo e përmbytjeve në Jug, shpërthen tritoli në vend. Janë si të lidhura online gjërat që ndodhin dhe asgjë kot e vetvetiu nuk ndodh gjëkundi.

Është për t’u përshëndetur përpjekja e gjatë e Kryeministrit Rama për të bashkëpunuar me Presidentin, më Visho Ajazin, me Llallën, por dhe me Opozitën. Është për t’u admiruar gjithashtu edhe durimi e sjellja e urtë dhe plot ekuilibër e Ilir Metës në Parlament. Por durimi ka një kufi dhe votat që ata kanë marrë as nuk janë pronë e përhershme e tyre dhe, as nuk u janë dhënë pa kushte nga sovrani popull. Mbase do ta linin të qetë të gëzonte pensionin e vet Sali Berishën, edhe pse i ka bërë zullume të mëdha këtij vendi me apo pa dashje, me apo pa dije. Mbase do ta linin të fliste sa herë të donte e çfarë të donte dhe në Parlament. Por ai vete po e kërkon sherrin e dhunën tash sa kohë dhe me të gjitha mjetet. Kështu që kemi mbërritur në një pikë tolerimi e durimi të skajshëm, sa është futur në vallë stabiliteti i vendit, shthurja e shembja e regjimit kushtetues, devijimi nga demokracitë perëndimore në oligarki ruso-arabe etj. Kështu, o veprohet shpejt, o i lëshohet vendi atyre që janë më të zotët të realizojnë vullnetin e 2/3 të shqiptarëve, o vendi po shkon drejtë rrokullimës. Është e qartë se institucionet e sigurisë: SHISH, Prokuroria dhe Drejtësia nuk ecin asgjëkundi me hapin e reformave jetike të zhvillimit europian të vendit dhe vendosjes së shtetit ligjor, që ka ndërmarrë Qeveria. Madje, shpesh ato e sabotojnë punën e saj. Gjithë Opozita ngjan me një organizate armike të Ramës, të Tahirit, të Qeverisë dhe shtetit të vet, duke nxirë, duke kundërshtuar e sabotuar çdo reformë jetike të saj dhe më e patolerushmja, duke u vënë përkrah vjedhësve të energjisë, anarkistëve të ndërtimeve, drogaxhinjëve të Lazaratit e Dukagjinit dhe sot edhe përkrah terroristëve të tritolit! Një Opozitë hipokrite në palcë, e cila për çfarë bën vete natën, akuzon se e bën Qeveria ditën. Kjo është sjellje tipike e një opozitë arabe, që nuk ka kurrë farë lidhje me kulturën perëndimore të opozitarizmit. I mungonin vetëm armët dhe aksionet e armatosura, që të ngjanin me xhihadistët apo ISIS-in. Por me sa shihet edhe ato po dalin tashmë në skenë dhe po tronditin seriozisht rëndin kushtetues, pronën dhe jetën e çdo shqiptari. Kupa është mbushur thonë më mijëra shqiptar në rrjetet sociale e në sondazhet e mediave të ndryshme. Lexoni e binduni. Është mbushur me tolerimin dhe durimin e tepruar ndaj provokimeve të PD-së private të Sali Berishës. Por është mbushur dhe me prova të krimeve që nuk kanë as të numëruar e as të sosur, të cilët fatkeqësisht Prokuroria e Gjykatat tona presin të vetëdeklarohen apo vetëdorëzohen! Ndaj, kush nuk vepron sot në mbrojte të ligjshmërisë, të jetës e pronës së njerëzve, të sistemit demokratik, të shtetit dhe Qeverisë se ligjshme të shqiptarëve, është i paaftë ose është bashkëpunëtor e bashkëfajtor në krim. Nëse nuk kemi njerëz të zot sot, që ta fillojnë këtë gjyq, nesër është vonë, sepse vendin Berisha po e qon buzë të njëjtës greminë, që ka përfshirë botën arabe.