Deputeti i PD-së, Agron Gjekmarkaj akuzon qeverinë për korrupsion, manipulim të realitetit dhe përdorim të dhunës ndaj qytetarëve dhe opozitës. Gjatë fjalës në seancën e kësaj të enjte, Gjekmarkaj theksoi se në jetën publike “fjala nuk është thjesht komunikim, por akt ndërgjegjeje mes së vërtetës dhe gënjeshtrës”, duke iu referuar zhvillimeve të fundit politike.
Duke iu referuar hetimeve të SPAK, Gjekmarkaj pretendoi se janë sekuestruar pasuri të konsiderueshme, që sipas tij tregojnë nivelin e korrupsionit në vend. ”Realiteti nuk është propagandë. Realiteti është fakti që një ‘e pastrehë’ rezulton me apartamente dhe vila”,-u shpreh ai, duke e lidhur këtë me atë që e quajti sistem klientelist dhe të korruptuar.
Nënkryetari i Kuvendit solli gjithashtu në vëmendje procesin e rindërtimit pas tërmetit të vitit 2019 në Lezhë dhe zona të tjera, duke pretenduar se premtimet nuk janë realizuar dhe se qytetarët ende presin strehim. Në fjalën e tij, Gjekmarkaj akuzoi gjithashtu institucionet e rendit për përdorim të tepruar të forcës ndaj protestuesve, duke përmendur drejtues policie dhe ministra, të cilët sipas tij justifikojnë veprimet e dhunshme si “rend dhe ligj”.
Ai përmendi edhe disa figura të opozitës, përfshirë Sali Berishën, duke thënë se ndaj tyre është përdorur trajtim selektiv dhe i padrejtë. Në përfundim të fjalës së tij, Gjekmarkaj u shpreh se Shqipëria ndodhet në një “realitet të përmbysur”, ku, sipas tij, i ndershmi ndëshkohet ndërsa i korruptuari favorizohet, duke theksuar se shumë qytetarë po largohen nga vendi për shkak të kësaj situate.