Avokati Beci skanon BKH-në dhe tregon pse Joni Keta është zgjidhja e duhur: Ka shfaqur integritet

Joni Keta është propozuar për të qenë në krye të Byrosë Kombëtare të Hetimit (BKH). Avokati dhe ish-prokurori Eugen Beci ka bërë një analizë kritike të mënyrës se si ka funksionuar BKH deri më sot. Sipas Becit, marrëdhënia mes oficerëve të BKH-së dhe prokurorëve të SPAK-ut jo gjithmonë ka qenë harmonike, për shkak të sjelljes së hetuesve.

Beci e sheh emrin e Joni Ketës si garanci për rikthimin e profesionalizmit. Ai vlerësoi faktin se Keta vjen nga radhët e oficerëve të karrierës së Policisë Gjyqësore dhe jo nga jashtë sistemit.

”Joni Keta është një kandidaturë që vjen nga një përvojë e gjatë si oficer i policisë gjyqësore. Ai ka shfaqur integritet dhe do të përcjellë përvojën e punës së tij te këta hetues, që shumë prej tyre janë të rinj. Besoj se Keta do ta eliminojë këtë problematikë”, analizoi avokati.

Joni Keta është përzgjedhur nga Komisioni i Përzgjedhjes pranë SPAK dhe emri i tij i është dërguar Këshillit të Lartë të Prokurorisë (KLP). Sipas Becit, votimi në KLP pritet të jetë formalitet, pasi peshën kryesore e ka përzgjedhja nga vetë struktura e posaçme.