Balla i përgjigjet Berishës: Shko në protestë po ta mbajti!

Kryetari i PD Sali Berisha është përfshirë në debat me kreun e grupit parlamentar Taulant Balla dhe shkak është bërë protesta e qytetarëve në Kuvend. Berisha po mbronte protestën duke kërkuar rrëzimin e Ramës ndërsa Balla e sfidoi të shkonte në protestë për të parë nëse do të pranohej ose jo nga qytetarët.

Pjesë nga diskutimi: 

Sali Berisha: Nuk mund t’i shtypni ata që kanë marrë mbështetje ndërkombëtare. Kërkesat e qytetarëve janë për largimin e menjëhershëm të Ramës, për anulimin e të gjitha ligjeve të amenduara nga Rama për mbrojtjen e mjedisit, me të cilat ju ndërtuat aeroportin e Vlorës dhe, për këtë arsye, i dënuat flamingot me vdekje. Po ashtu, ndërtuat pikën e vogël në Parkun e Butrintit, me të cilën shkatërruat trashëgiminë kulturore dhe pasuritë kombëtare të shqiptarëve, duke harruar se ato janë edhe pasuri evropiane.

Unë mendoj se vazhdimi me çështje të tjera në këtë Parlament, pa ardhur Rama këtu për mocion me debat, është një akt sa tradhtie, aq edhe cinizmi ndaj qytetarëve shqiptarë. Nuk keni të drejtë të injoroni qindra mijëra qytetarë që prej 18 ditësh mbajnë në dorë flamurin e ligjit, duke sakrifikuar orë të tëra. Se kush po tregohet fashist tani, ju apo ata, këtë e lë në gjykimin e qytetarëve.

Taulant Balla: Së pari, kërkesa është formuluar gabim dhe nuk mund të merret në konsideratë. Nga deputeti që mori fjalën në emër të kërkuesve nuk dëgjuam asnjë argument që lidhet me kërkesën. Kërkesa nga grupi ynë do të rrëzohet. Kemi pasur një diskutim në Konferencën e Kryetarëve, ku vetë deputetët kanë kërkuar që këto iniciativa të shqyrtohen. Megjithatë, nuk dëgjuam asnjë argument.

I fundit që mund të flasë për protestuesit është ky pelikan këtu. Nëse do të zbatosh atë që të ftoj unë, Sali Berisha, shko sot pasdite në protestë. A shkon dot në protestë? Provoje, po ta mbajti. Unë kam bërë një kallëzim për ty dhe kam kontribuar në këtë drejtim. I ftoj protestuesit ta marrin në shqyrtim. Kush ju ka mandatuar ju ndonjëherë? I fundit je ti që mund të na paraqitesh si ndërmjetës mes nesh dhe protestuesve.