Berisha: Dënojmë trajtimin çnjerëzor të Metës. Akt i urdhëruar nga Rama

Kryetari i Partisë Demokratike, Sali Berisha, reagoi lidhur me trasformimin e Ilir Metës, i cili doli dje publikisht për herë të parë pas arrestimint të tij në tetor të 2024-ës.

Berisha theksoi se paraqitja e Metës në sallën e gjyqit në një kafaz xhami është një akt i pajustifikuar dhe i papërshtatshëm për një figurë politike të nivelit të tij.

“Ish-presidenti i Republikës, ish-kryetari i parlamentit dhe ish-kryeministri i vendit, Ilir Meta, aktualisht kryetari i partisë së dytë më të madhe opozitare, Partisë së Lirisë, i burgosur politik, u paraqit dje në sallën e gjyqit i ndryrë në kafaz xhami sikur të ishte një terrorist i rrezikshëm, ndonëse ndaj tij nuk ekziston asnjë provë e faktuar për një vepër penale të çdo natyre qoftë ajo.

Gjatë këtyre 17 muajve në burg, si person nën hetim dhe në kundërshtim me Kushtetutën, ndaj Ilir Metës, është ushtruar dhunë dhe terror psikologjik periodik, madje edhe fizik. Janë organizuar provokacione ndër më të ulëtat dhe më të rrezikshme. I janë dhunuar të drejtat kushtetuese më elementare”, tha Berisha.