Pas protestës të së dielës, këtë mbrëmje Sali Berisha mbajti fjalën si çdo të hënë në Foltoren para Kryeministrisë. Për protestën e djeshme, Berisha tha se opozita zgjodhi të mos mbante thjesht fjalime, por të përçonte zërin dhe zemërimin e qytetarëve. Sipas tij, protesta ishte një dëshmi se Partia Demokratike nuk pajtohet me atë që ai e quajti “diktaturë e drogës, krimit dhe dhunimit të shtetit”.
”Revolta jonë ishte një zotim qytetar se ashtu si përmbysëm diktaturën komuniste 34 vite më parë, do të përmbysim edhe këtë regjim”,-deklaroi Berisha. Ai paralajmëroi se vendi ndodhet në një udhëkryq të rrezikshëm, ndërsa theksoi se protesta dhe revolta janë, sipas tij, rruga e vetme për të sjellë ndryshim politik. Duke iu referuar zgjedhjeve të 11 majit, Berisha i cilësoi ato si farsën më të shëmtuar elektorale në historinë e pluralizmit, ndërsa shtoi se prej shtatë muajsh në vend është instaluar një parlament që nuk përfaqëson interesat e qytetarëve.
Kreu i PD-së u bëri thirrje qytetarëve, veçanërisht atyre që votuan opozitën, të reflektojnë mbi rolin e deputetëve në Kuvend, duke e cilësuar këtë rol si zero. Ai akuzoi edhe qeverinë se ka refuzuar çdo formë llogaridhënieje në Parlament, duke mos lejuar interpelanca apo ngritjen e komisioneve hetimore parlamentare. ”Sot Parlamenti nuk përfaqëson vullnetin e qytetarëve, por vetëm interesat e qeveritarëve, ndërsa opozita është e përjashtuar nga çdo zhvillim”,-tha Berisha.
