Pas largimit nga detyra e ministrit të Brendshëm, Besfort Lamallari ka reaguar përmes një postimi në rrjetet sociale, ku ka shprehur mirënjohjen për kryeministrin Edi Rama për besimin e treguar ndaj tij.
Lamallari thekson se këtë besim do ta shpërblejë përmes angazhimit të tij të ri pranë ekipit të Kryeministrisë, duke nënvizuar gatishmërinë për të vijuar kontributin e tij në këtë detyrë.
Në reagimin e tij, ai ka përcjellë gjithashtu urimet për pasuesin e tij, Ervin Demon, duke shprehur besimin se ai do ta ushtrojë detyrën me përkushtim dhe do t’i japë përparësi përgjegjësive që e presin.
Postimi i plotë
Nuk ka nder më të madh se t’i shërbesh vendit tënd, duke u përpjekur çdo ditë të japësh më të mirën tënde në përgjegjësitë që të besohen.
Drejtimi i Ministrisë së Drejtësisë dhe në veçanti i Ministrisë së Punëve të Brendshme, institucioni ku u rrita profesionalisht, politikisht dhe mbi të gjitha si njeri është më shumë se sa një privilegj. Është ‘libri i jetës’ i cili të udhëzon drejt më tej në çdo stacion vijues.
Për këtë mundësi të jashtëzakonshme, mirënjohje gjithmonë Kryeministrit Edi Rama, të cilit tashmë do të kem kënaqësinë e veçantë t’ia kthej nderin e lartë dhe besimin tek unë edhe përmes anagazhimit të ri si pjesë e ekipit të Tij.
Ka qenë një rrugëtim i paharrueshëm me ekipin më të mirë në krah dhe i bekuar nga mbështetja deri në sakrificë e familjes time.
Urime dhe mbarësi kolegut Ervin Demo. Jam i bindur që do të çojë përpara me sukses prioritetet e qeverisë dhe Ministrisë së Punëve të Brendshme.