Biznesi: Sipërmarrësit të solidarizohen për zonat e përmbytyra në jug

Dhoma e Tregtisë dhe Industrisë Tiranë u bëri sot një thirrje të hapur të gjithsë sipërmarrësve që të bëhen pjesë e ndihmës për banorët e zonave të përmbytura në jug të vendit.

Kryetari i Dhomës së Tregtisë dhe Industrisë Tiranë, Nikolin Jaka se bashku me një grup biznesmenësh në konferencën e sotme për shtyp deklaruan solidaritetin e tyre në ndihma qoftë në vlerë monetare, qoftë në ndihma ushqimore për banorët e këtyre zonave.

Në koordinim me shtabin e emergjencave dhe qeverinë shqiptare, sipërmarrësit kanë vendosur një fond të të ardhurave të tyre për të qenë pjesë e kontributit dhe ndihmës për këto zona.

Pranë Dhomës së Tregtisë dhe Industrisë Tiranë është ngritur grupi i punës që do të bëjë kordinimin e ndihmave të sipërmarrësve dhe do të jetë në komunikim të vazhdueshëm me Shtabin e Emergjencave Civile dhe Qeverinë Shqiptare në mënyrë që të adresojnë biznesin për ndihmat që ata afrojnë.

Kompanitë e para që janë bërë pjesë e kësaj ndihme ne vlerë monetare apo të tjera janë Dhoma e Tregtisë dhe Industrisë Tiranë, Eurosig, Yldon Media Group, Vodafone Albania etj.