Bllokimi i fruta-perimeve nga Maqedonia, Shqipëria ankohet në BE dhe CEFTA

Ministri i Bujqësisë, Zhvillimit Rural dhe Administrimit të Ujërave i Shqipërisë, Edmond Panariti, është shprehur kundër asaj që ai e quan luftë tregtare me Maqedoninë.

Pas bllokimeve të përsëritura që shteti fqinj u bën prodhimeve “Made in Albania” në pikat kufitare, ai thotë se ministria që drejton ka nisur procedurat e ankimimit në Bashkimin Europian dhe pranë CEFTA-s. Kështu në një intervistë ai ka nënvizuar se shteti maqedonas po penalizon dhe po shkakton dëme tek fermerët shqiptarë.

“Unë kam filluar procedurat e ankimimit në Bruksel dhe CEFTA, pasi kemi të bëjmë me ndalesa që pengojnë konkurrencën e lirë, që marrin natyrisht edhe format e një lufte tregtare. Ua kam bërë këtë të ditur autoriteteve maqedonase, por deri tani nuk kam marrë një reagim të mjaftueshëm, pasi ata mbështeten tek marrëveshja fitosanitare, që përdoret në këtë rast në mënyrë abuzive. Ne eksportojmë në Gjermani, Bullgari, Rumani dhe nuk kemi asnjë ndalesë, kjo që na bën Maqedonia është diskriminuese. Nuk është rruga e duhur që t’u përgjigjemi me masa simetrike, duke bllokuar kamionët tranzitë etj., sepse futemi në një klimë të tensionuar raportesh. Por, hapi ynë i parë është Brukseli, hapi i dytë CEFTA, pastaj do të vazhdojmë diskutimet në nivele të larta. Nëse situata përsëritet, hapi ynë i fundit ngelet të kalojmë në masa të ngjashme”,- ka thënë Panariti për "TCH".