Cani: Nuk tolerojmë vjedhjen e energjisë, mbështesim OSHEE

I pranishëm në një nga aksionet e OSHEE, në “Rrugën e Kavajës”, Tiranë, ka qenë edhe ministri i Financave, Shkëlqim Cani, i shoqëruar nga drejtuesit e kompanisë. Ministri u njoh nga afër me rezultatet e aksionit, ku më pas dha një prononcim të shkurtër për mediat.

“Drejtuesit e OSHEE më falenderuan mua dhe qeverinë për mbështetjen që po u japim, por në fakt jemi ne që duhet t’i falenderojmë për punën e vështirë të mbledhjes së detyrimeve të prapambetura dhe shkëputjes së lidhjeve të paligjshme të energjisë elektrike. Energjia elektrike e papaguar dhe e vjedhur, i kushton buxhetit të shtetit në vit rret 150 milionë euro. Kjo është e patoleureshme!”, deklaroi ministri Cani për mediat.

Kreu i Financave theksoi edhe se qeveria është e vendosur që t’i shkojë deri në fund këtij aksioni, derisa gjithëkush ta kuptojë se energjia elektrike është një mall që duhet paguar.

Deri më tani janë shkëputur rreth 19 mijë lidhje të paligjshme në rrjetin e energjisë elektrike.

“Nuk mund ta mbulojnë vjedhjen e energjisë konsumatorët e ndershëm që e paguajnë. Kjo nuk mund të ndodhë më. Duhet të ndërgjegjësohen për ta paguar, përpara se të përballen me forcën e ligjit”, vijoi më tej ministri.

Të dhënat e fundit tregojnë se, brenda harkut kohor të një viti, kompania ka reduktuar humbjet në rrjet deri në 31.7 %, të rrisë arkëtimet me 20%, si dhe të menaxhojë treguesit financiarë duke kursyer 7.6 milionë dollarë.

“Të gjitha këto janë shenja të mira dheurojmë që të vazhdohet më me sukses kjo veprimtari në të gjithë Shqipërinë”, përfundoi ministri.