Pas përplasjeve të vitit 2014, debati për ndarjen territoriale të bashkive është rikthyer sërish mes Partisë Socialiste dhe Partisë Demokratike. PS synon që në zgjedhjet e ardhshme vendore të 2027, gara të zhvillohet me 46 bashki, ndërsa opozita kërkon një zgjerim të hartës territoriale duke propozuar rreth 100 bashki. Të dyja palët janë të një mendimi për të mos rikthyer komunat, të cilat u eliminuan 12 vite më parë, por disa prej emrave të ish-komunave pritet të rikthehen si bashki me drejtues të zgjedhur nga qytetarët.
Në qarkun e Shkodrës, PS propozon shkrirjen e Bashkisë Fushë-Arrëz, ndërsa opozita kërkon ruajtjen e saj dhe rikthimin e njësive të tjera si Velipoja, Drishti, Kopliku dhe zona të tjera si bashki më vete. Në Lezhë, socialistët nuk parashikojnë ndryshime në hartën aktuale, ndërsa demokratët kërkojnë rikrijimin e pesë bashkive të tjera, mes tyre Bregu i Matës, Zadrima, Rubiku, Oroshi dhe Mamurrasi. Edhe në Kukës mazhoranca nuk propozon ndryshime, por opozita kërkon rikthimin e Shishtavecit dhe Bicajt si njësi vendore më vete.
PS në qarkun Dibër kërkon shkrirjen e Bashkisë Klos, ndërsa PD propozon shtimin e Maqellarës, Shupenzës, Kastriotit dhe Lurës, duke e çuar numrin e bashkive në tetë. Në qarkun e Durrësit, mazhoranca ruan ndarjen aktuale, ndërsa opozita kërkon rikthimin e Sukthit dhe Fushë-Krujës. Për Tiranën, PS propozon zgjerimin e territorit të kryeqytetit me Rinasin dhe bashkimin e Rrogozhinës me Kavajën. Nga ana tjetër, opozita kërkon rikrijimin e disa bashkive të tjera, përfshirë Ndroqin, Arbanën, Dajtin, Kasharin dhe Petrelën.
Kurse në Elbasan PS kërkon reduktimin në katër njësi vendore, duke hequr Belshin, Cërrikun dhe Përrenjasin. Demokratët, ndërkohë, kërkojnë shtimin e Bradasheshit dhe Shpatit. Në Korçë, mazhoranca propozon shkrirjen e Bashkisë Maliq, ndërsa opozita kërkon rikthimin e Leskovikut, Mokrës, Pojanit dhe Voskopojës. Gjithashtu kërkohet rishikimi i qendrës administrative të Kolonjës.
Në Fier, PS propozon kalimin e Divjakës te Lushnja dhe shkrirjen e Patosit. Opozita kërkon rikthimin e disa njësive të tjera si Ardenica, Krutja, Dushku, Fratari, Levani dhe Cakrani. Në Berat, sipas propozimit të mazhorancës, Dimalit i bashkohet Berati dhe shtohet edhe Poliçani. Demokratët kundërshtojnë këtë ndarje dhe kërkojnë krijimin e bashkive të reja si Shpiragu dhe Otllaku. Në Vlorë, PS propozon përfshirjen e Selenicës, ndërsa opozita kërkon rikthimin e Amantias, Orikumit, Ksamilit dhe Novoselës si bashki të veçanta.
Në Gjirokastër, mazhoranca kërkon reduktimin e numrit të bashkive duke hequr zgjedhjet vendore në Libohovë, Memaliaj dhe Këlcyrë. Opozita, nga ana tjetër, nuk kërkon ndryshime në këtë qark. Në total, socialistët propozojnë reduktimin e 15 bashkive, ndërsa opozita kërkon krijimin e 39 bashkive të reja, duke e bërë ndarjen territoriale një nga çështjet kryesore të debatit politik për zgjedhjet vendore.