Diaspora në protestë kundër Ramës, aktivisti akuza për bllokimin e makinave me flamuj në Mal të Zi

Aktivisti shqiptar që jeton në Londër, Artan Daçi ka denoncuar një situatë të krijuar gjatë udhëtimit të tij drejt Shqipërisë, ku synon t’i bashkohet protestës së diasporës që pritet të zhvillohet në Tiranë. Daçi tha se disa automjete të autokolonës me të cilën po udhëton drejt Shqipërisë janë ndaluar në pikën kufitare të Malit të Zi.

”Disa prej pjesëtarëve të autokolonës janë duke pritur që të hyjnë në Mal të Zi, edhe pse nuk po lejohen, sepse kanë marrë urdhër nga autoritetet shqiptare. Janë katër makina që janë atje”, deklaroi Daçi. Aktivisti tregoi se autokolona është identifikuar gjatë gjithë rrugëtimit për shkak të logove të vendosura në automjete. Ai tha se udhëtimi është shoqëruar edhe me mbështetje nga shqiptarë në qytete të ndryshme.

”Ne jemi të identifikuar, pasi i kemi vendosur me logo makinat. Në çdo qytet që kemi ndalur, jemi bashkuar me njerëz, me shqiptarë që na ndalojnë dhe fotografohen. Ata shprehen se do të donin shumë që të ishin në protestë”, u shpreh ai për ”News 24”. Sipas Daçit, gjatë rrugës autokolonës i janë bashkuar edhe motoristë, ndërsa ai përshkroi emocionet e shqiptarëve që kanë takuar gjatë udhëtimit.

“Po na bashkohen dhe autokolona me motora. Disa prej tyre na falënderojnë, iu dridhen zërat nga emocionet”, tha aktivisti. Daçi paralajmëroi se nëse ndalimi do të vijojë dhe pjesëtarët e autokolonës nuk do të lejohen të vazhdojnë udhëtimin, ata do të kërkojnë ndërhyrjen e ambasadave përkatëse. Aktivistët shqiptarë nga diaspora pritet t’i bashkohen protestës së paralajmëruar për nesër në Tiranë, ku pritet të zhvillohet një tubim kombëtar.