Energjia e rinovueshme, investitorët danezë me sytë nga Lezha

Investitorët danezë kanë shfaqur interes për të formësuar në Lezhë projekte në fushën e energjisë së rinovueshme ku mund të instalohen fusha me mullinj ere dhe panele diellore për të shfrytëzuar burimet e zonës. Grupi i investitorëve e paraqiti projektin tek kreu i Bashkisë së Lezhës, Fran Frrokaj.

Helge Andersen: “Ne e dimë që energjia këtu në Shqipëri prodhohet nga hidrocentralet dhe po shikojmë mundësitë e tjera të prodhimit të energjisë nga era dhe energjia e diellit sepse është një mundësi shumë e mirë për Shqipërinë dhe ne dimë se do të ndodhë herët apo vonë. Energjia e hidrocentraleve nuk do të mjaftojë pasi ka një kërkesë të lartë dhe shumë kosto. Ndaj dhe ne jemi të interesuar të investojmë në këtë drejtim”

Kryebashkiaku Frrokaj u shpreh se Lezha është një vend mjaft i favorshëm për të investuar në fushën e energjisë së rinovueshme, duke garantuar se insitucioni që ai drejton do të jetë bashkëpunues në këtë drejtim.

Fran Frrokaj: “Lezha është një vend me shumë mundësi të mëdha në këtë drejtim. Ka rreth 280 ditë në vit me diell.”

Investitoret danezë do të kërkojnë dhe mbështetjen e qeverisë shqiptare me qëllim që projekti i tyre të bëhet realitet në një kohë të shpejtë.