Euronews: Shqipëria pranë anëtarësimit, BE-ja mendon për epokën e re

Zgjerimi i Bashkimit Europian po hyn në një fazë të re, me Shqipërinë dhe Malin e Zi që po afrohen me shpejtësi drejt anëtarësimit, ndërsa Ukraina dhe Moldavia po përparojnë në procesin e integrimit. Sipas Euronews, Brukseli po përgatitet paralelisht për reforma që do t’i mundësonin Unionit të funksionojë me 30 ose më shumë shtete anëtare.

Procesi i zgjerimit ka marrë një hov të pazakontë. Gjatë gjashtë muajve të fundit janë mbyllur më shumë kapituj negociues se në një pjesë të madhe të dekadës së fundit. BE-ja po e përdor zgjerimin jo vetëm si proces integrimi, por edhe si instrument për forcimin e sigurisë dhe stabilitetit në fqinjësinë europiane. Shqipëria dhe Mali i Zi nuk pritet të ndryshojnë ndjeshëm ekuilibrin brenda BE-së për shkak të madhësisë së tyre, por përparimi i tyre ngre pyetje për Serbinë, vendin më të madh të Ballkanit Perëndimor. Ndërkohë, Ukraina dhe Moldavia pritet të kenë një rol gjithnjë e më të rëndësishëm në këtë proces. Edhe Islanda mund të rikthehet në tryezën e negociatave, në varësi të referendumit të saj deri më 29 gusht.

Sfida më e madhe mbetet mënyra se si do të funksionojë një BE më i madh. Në diskutim janë heqja e unanimitetit në disa fusha, veçanërisht në politikën e jashtme, një Komision Europian më i vogël dhe mekanizma më të fortë për mbrojtjen e demokracisë dhe sundimit të ligjit.

Komisioni Europian pritet të publikojë më 30 shtator një plan për reformimin e procesit të zgjerimit dhe funksionimit të Unionit. Megjithatë, rruga nuk është pa rreziqe. Rezistenca politike në disa vende anëtare, veçanërisht në Francë dhe Holandë, mund ta vështirësojë ratifikimin e anëtarësimeve të reja. Mali i Zi pritet të jetë një nga rastet e para që do të testojë në praktikë gatishmërinë e vendeve anëtare për të pranuar zgjerimin.

Ekspertët paralajmërojnë se një dështim në fazën e ratifikimit do të godiste rëndë besueshmërinë e procesit. Për këtë arsye, BE-ja po përballet me një moment vendimtar: të zgjerohet dhe të forcojë ndikimin e saj, por njëkohësisht të reformojë mënyrën se si merr vendime dhe funksionon si Union.