BRUKSEL- Në një kohë kur e gjithë vëmendja është tek hapja e negociatave të Shqipërisë me BE, kreu i Diplomacisë shqiptare, Ditmir Bushati ka shfrytëzuar samitin e Ballkanit Perëndimor për të shprehur pritshmëritë e vendit tonë.

Teksa Bushati fliste para të pranishmëve në Bruksel, ndër pjesëmarrësit më të pavëmendshëm duket se ka qenë kreu i PD-së Lulzim Basha. Në disa prej fotove të publikuara nga takimi në fjalë, shihet sesi Basha është i përgjumur, gati-gati e ka ‘zënë gjumi’. Ndërkohë, Ministri i Jashtëm, Bushati, me anë të një mesazhi në rrjetet sociale thekson se e vlerëson faktin se Basha ishte i pranishëm në sallë.

“Të them të drejtën e vura re që zoti Basha ishte në sallë së bashku me pjesëmarrësit e tjerë, dhe e vlerësoj praninë e tij të heshtur në këtë sallë, aq më tepër një panel ku diskutohej për politikat e zgjerimit dhe zhvillimit në Ballkanin Perëndimor. Përsa i përket asaj që zoti Basha ka deklaruar në mbështetje të procesit të negociatave me Shqipërinë, them më mirë vonë se sa kurrë”, tha Bushati.