Furnizimi me ujë i qyteteve- Botohet në Fletoren zyrtare marrëveshja prej 10 milionë eurosh me KfW-në

Marrëveshja (SECO II) midis KFW dhe qeverisë shqiptare prej 10 milionë eurosh për financimin e programit të infrastrukturës bashkiake III/IV është botuar në Fletoren Zyrtare dhe hyn në fuqi pas 15 ditësh.

Ky financim do të shkojë për investime me qëllim furnizimin me ujë dhe ndërtimin e rrjetit të kanalizimeve në 7 qytete në vend. Financimi do të jepet nga Banka “KFW” dhe përfitues janë qytetet Berat, Kuçovë, Delvinë, Gjirokastër, Kamëz, Librazhd, dhe Lushnjë.

Në këtë program, Ministria e Transportit dhe Infrastrukturës, Agjencia Kombëtare e Furnizimit me Ujë dhe Kanalizimeve, do të veprojë si Njësi e Koordinimit të Programit (“NJKP” ) dhe ndërmarrjet e ujësjellës-kanalizimeve, do të veprojnë si Agjenci të Zbatimit të Projektit (AZP).

Sektori i ujësjellës-kanalizime në vend ka nevojë për shumë investime, pasi perfomanca e operatorëve është e dobët dhe uji pa të ardhura për shkak të amortizimit të rrjetit dhe humbjeve administrative mbetet në nivele alarmante prej disa vitesh, në masën 67 për qind.

Investimet e këtij lloji në Shqipëri nga KFW tashmë janë bërë të zakonshme, pasi ky institucion është fokusuar së shumti në sektorin ujësjellës-kanalizime, energjetike dhe mjedis.