Akti i lartë i qytetarisë dhe ndershmërisë së 14-vjeçarit nga Shkodra që i kthen çantën turistes belge

Nuk mund të kalonte pa vëmëndje mediatike, akti i djaloshit nga Shkodra, i cili do t’i kthente çantën një turisteje belge, duke nënshkruar kësisoj një gjest të admirueshëm ndershmërie.

Ndërsa bashkëmoshatarët e tij i kalonin ditët e verës mes plazhit dhe argëtimit, 14-vjeçari Ardis Plisi nga Shkodra ka zgjedhur një tjetër rrugë: të punojë për të ndihmuar familjen. Por përtej përkushtimit të tij në punë, ai ka tërhequr vëmendjen edhe për një gjest që flet për edukim dhe ndershmëri të rrallë.

Dy ditë më parë, gjatë orarit të punës në një kafene në zonën turistike të Shirokës, Ardisi ka gjetur një çantë të harruar nga një turiste belge. Brenda saj ndodheshin para në cash, karta bankare, dokumente personale dhe bileta udhëtimi — një pasuri e vogël personale, por me vlerë të madhe për pronaren.

Pa hezitim, ai ka vendosur ta dorëzojë çantën në mënyrë të rregullt. “Si mund të mos ia ktheja? Familja ime më ka mësuar se çdo gjë që nuk është e jotja duhet t’i kthehet pronarit,” ka thënë adoleshenti, duke e thjeshtuar një gjest që në thelb flet shumë për karakterin e tij.

Pronar i lokalit ku punon Ardisi e përshkruan atë si një djalë të rrallë për moshën e tij. “E kam marrë në punë sepse është shumë i përgjegjshëm dhe i aftë. Punon me orë të gjata dhe është një ndihmë e madhe për lokalin. Gjesti i tij më ka prekur,” është shprehur ai.

Ndërkohë, turistja belge Katrine Fabianne e ka kuptuar mungesën e çantës vetëm pasi kishte mbërritur në Theth. Fillimisht ka menduar se gjithçka ishte humbur, por më pas ka marrë mesazhe të shumta nga qytetarë shqiptarë në rrjetet sociale, të cilët e kanë informuar për gjetjen e saj dhe dorëzimin në polici.

“Kur shkova në komisariat dhe mora sendet e mia, nuk mund ta besoja. Nuk e kisha imagjinuar kurrë një gjest të tillë. Jam shumë mirënjohëse ndaj Ardisit. Në Shqipëri kam takuar njerëz të mrekullueshëm,” ka rrëfyer ajo.

Rasti i Ardisit nuk është i izoluar në këtë zonë. Shkodra ka shënuar edhe më herët shembuj të ngjashëm ndershmërie, si ai i 16-vjeçarit Erind Shkambaj, i cili dy vite më parë gjeti një portofol me mijëra euro dhe e dorëzoi tek pronari i tij, një turist italian.

Në një kohë kur shpesh vëmendja përqendrohet te lajmet negative, këto histori mbeten një kujtesë e thjeshtë, por e fortë, se gjestet e vogla të ndershmërisë vazhdojnë të jenë ndër treguesit më të qartë të një shoqërie që ruan vlerat e saj.

Përgatiti: Albert Vataj