Gjiknuri: Shqipëria, treg i sigurt energjetik

Ministri i Energjisë, Damian Gjiknuri, u shpreh sot gjatë inaugurimit të HEC-it të Banjës, se Shqipëria po shndërrohet në një treg të sigurt energjetik. Gjiknuri tha se realizimi i projektit hasi në vështirësi gjatë vitit 2013-ë dhe 2014-ë për shkak të problemeve me komunitetin, por qeveria ia doli t’i zgjidhë ato.

“Kjo vepër i përket shqiptarëve dhe kontributit të shumë qeverive shqiptare. Po të mos ishin zgjidhur në vitin 2013 dhe 2014 problemet e mbartura me komunitetin, zgjidhja që dhamë me ndërtimin e infrastrukturës dhe zgjidhja që një pjesë u mor përsipër nga qeveria dhe pjesa tjetër nga Stakrafti, nuk do të ishte e mundur. Falë kësaj, ne kemi sot një nga veprat më të rëndësishme energjetike. Shqipëria do të jetë një treg i sigurisë dhe i besueshëm energjetik”, u shpreh Gjiknuri.

Si deputet i Gramshit, Gjiknuri tha se nga kjo vepër do të përfitojë e gjithë zona.

“E kthen Gramshin nga një xhep që ka qenë, në një nga zonat më të frekuentuara në Shqipëri”, tha ai.

Hidrocentrali i Banjës pritet që të rrisë me të paktën 5 për qind prodhimin vendas të energjisë nga hidrocentralet.

Liqeni artificial i Banjës ka një sipërfaqje prej 14 kilometrash katrorë. Nga përmbytjet, ndërtimet e rrugëve dhe linjave të tensionit të lartë, janë prekur mjaft familje. Shumica ka përfituar nga shpronësimet, ndërsa disa prej tyre janë shpërngulur në banesa të reja.

Banja është hidrocentrali i parë i projektit Devolli HidroPower dhe do të pasohet nga ai i Moglicës. Ndërtimi është bërë për pak më shumë se 3 vite. I gjithë projekti, që përfundon në 2019, i kalon 530 milionë euro dhe pritet sërish të punësojë mijëra banorë lokalë.