Udinese dhe Como u ndanë në një barazim pa gola (0-0), në ndeshjen që u luajt mesditën e sotme.
Takimi i zhvilluar në Stadio Friuli ishte i varfër në raste të pastra. Në pjesën e parë, tentativat e Atta, Nico Paz dhe Kamara nuk arritën të vënë në vështirësi portierët Butez dhe Okoye, ndërsa ritmi i lojës mbeti i ulët dhe pa shumë ide në fazën sulmuese.
Edhe në fraksionin e dytë loja nuk ndryshoi shumë. Okoye u tregua vendimtar në nisje të pjesës së dytë, duke ndalur goditjen e Douvikas, ndërsa të dyja skuadrat vazhduan të hasin vështirësi për të shfrytëzuar cilësinë që zotërojnë në repartin ofensiv.
Trajnerët Kosta Runjaic dhe Cesc Fabregas tentuan të ndryshonin rrjedhën e lojës përmes zëvendësimeve, por pa sukses. Rasti më i mirë erdhi në minutën e 87-të, kur Vojvoda provoi me një parabolë, por nuk arriti të mposhtë Okoye.
Me vërshëllimën përfundimtare u vulos rezultati 0-0, që e çon Comon në kuotën e 58 pikëve dhe Udinesen në 40.