Kryetarja e PD-së për Njësinë 9 në Tiranë, Eda Grimci gjatë fjalës në protestën e PD përballë Kryeministrisë, u ka bërë thirrje qytetarëve që të reagojnë dhe të mos largohen nga vendi. Në protestën e shtatë të opozitës ajo iu drejtua nënave që kanë përcjellë fëmiëjt e tyre në emigrim që të ngrihen dhe të protestojnë dhe të mos votojnë hajdutët.
“Jam këtu si nënë që nuk pranon të rrisë fëmijët në një vend ku largimi shihet si mundësi. Prandaj nga ky shesh së pari ju drejtohem pikërisht nënave. Atyre që çdo ditë përcjellin fëmijët me lotë në sy në aeroport. Atyre që jetojnë mes mallit dhe frikës për të ardhmen e tyre. Çohuni për fëmijët tuaj, mos lejoni t’ua largojnë. Jam këtu si bijë e dy prindërve që meritojnë dinjitet, respekt, shërbime dhe jo mashtrime apo bonuse gjysmagjeli të këtij mashtruesi. Mendoni për vete. Sot ju drejtohem prindërve, gjyshërve tanë që keqpërdoren në çdo fushatë. Mendoni për fëmijët tuaj të cilët me paratë e fituara me mund nëpër botë duhet të kujdesen edhe për juve. Mos i lejoni më t’ju poshtërojnë. Reagoni kundër hajdutëve. Mos i votoni më”, apeloi ajo. Grimci iu drejtua edhe të rinjve, duke i inkurajuar të mos dorëzohen dhe të mos largohen nga Shqipëria, ndërsa theksoi se ata janë shpresa dhe energjia për ndryshim.
“Ju drejtohem të rinjve, atyre që sot janë në shesh, por dhe atyre që janë jashtë e nuk mund të jenë sot me ne. Ju jeni arsyeja pse kjo betejë nuk ndalet. Ju jeni shpresa, energjia. Mos i dëgjoni kur ju thonë se jeni brez dembelësh e indiferentësh. Këtë duan këta që ju të mendoni, pasi kanë frikë nga ju. Reagoni e mos i lejoni t’ju marrin ëndrrat, shpresën, punën, mundësinë. Mos ikni nga ky vend me valixhe në duar e me dhimbje në zemër. Kjo nuk është mundësi. Jo, kjo është tragjedi. Ky është shpopullim. Kjo është vrasje e të ardhmes. Shkolla pa kushte, arsim i shitur, mësues të detyruar të bëhen ushtarë politikë, të rinj që mësojnë me dhimbje vetëm një gjë; që në këtë vend nuk fiton më i miri, por më i lidhuri, më patronazhisti dhe ti sipas tyre duhet të heshtësh, po deri kur kështu nuk është jetë, është poshtërim. Në çdo shtëpi shqiptare ka një plagë, ka një djalë larg, ka një vajzë larg, ka një nënë që pret një telefonatë, një baba që mban lotët nga pamundësia dhe nga frika për një vend të mjerë pune. Mjaft më”, u shpreh ajo.
Ajo akuzoi qeverinë për presion dhe dhunë ndaj qytetarëve gjatë protestave të mëparshme të opzoitës. Grimci i bëri thirrje opozitës që të jetë në lartësinë e pritshmërive të qytetarëve. “Ata kërkojnë drejtim, kërkojnë vendosmëri, kërkojnë një opozitë që nuk tërhiqet, që nuk hesht, që nuk bën kompromis me të keqen. Sot është momenti i të gjithë neve për të qenë në lartësinë e kësaj sakrifice qytetare, për të qenë zëri i tyre i palëkundur e i pandalshëm, sepse njerëzit nuk dalin për fjalë, kanë dalë për ndryshim dhe ndryshimi nuk pret më. Le ta bëjmë këtë betejë bashkë me guximin e qytetarëve, me forcën e grave dhe nënave, me energjinë e të rinjve, me përjmin përgjegjshmërinë e padiskutueshme të doktor Berishës dhe lidershipit të Partisë Demokratike, sepse Shqipëria meriton më shumë, sepse shqiptarët meritojnë dinjitet. Ky është momenti, ky është vendimi, ky është zgjimi. Shqipëria nuk është e tyre. Shqipëria është e jona”.