Hallouin, Shtëpia e Bardhë hap dyert për festën e “të vdekurve”

Presidenti amerikan, Barack Obama dhe zonja e parë, Michele Obama kanë hapur dyert e Shtëpisë së Bardhë për festën e Hallouinit, duke ofruar karamele për fëmijët nga shkollat lokale dhe fëmijët e familjeve të ushtarëve.

Shtëpia e Bardhë u dekorua sipas temës “Pylli i mahnitur”, ndërsa akrobatë me kostume të ndryshme shumë ngjyrëshe performuan në një spektakël për disa orë, për të argëtuar fëmijët.

Presidenti dhe zonja e tij shpërndanë karamele dhe ëmbëlsira për fëmijët, të gjithë të veshur me kostumet e superheronjve, si princesha, si karakteret e filmave “Lufta e yjeve” apo edhe si Papa Francesku.

Këtë vit, lëvizja e ditëve përpara Hallouinit është quajtur si “Lufta e sheqerit” për shkak të kërkesave të larta për ëmbëlsira dhe karamelet tipike të kësaj feste.

Organizata Botërore e Shëndetësisë e ka futur sheqerin në listën e produkteve që shkaktojnë sëmundje kronike si diabeti dhe sëmundjet e zemrës.

Amerikanët kanë shpenzuar plot 2.1 miliardë dollarë për ëmbëlsira këtë vit, sipas të dhënave zyrtare të Federatës Kombëtare të Shitjeve.